O‘zbekiston Markaziy banki noyabr oyida dunyodagi boshqa moliyaviy regulyatorlardan ko‘proq oltin sotdi. Bu haqda Jahon Oltin Kengashining (WGC) oylik ma’lumotlariga tayanib, Spot xabar berdi.
Hisobotga ko‘ra, noyabr oyida jahon markaziy banklarining jami oltin zaxiralari 21,5 tonnaga kamaygan. Bu 2021-yil yanvaridan beri birinchi marta qisqartirish hisoblanadi.
Aynan noyabr oyida oltin narxi oxirgi 5 oy ichida maksimal darajaga yetgan — har unsiya uchun 1866 dollar. O‘zbekiston esa oltinni eng yuqori cho‘qqisida sotishga harakat qilmoqda.
Oltin O‘zbekistondan (21,5 tonna) tashqari Turkiya (7 tonna), Rossiya (3,1 tonna) va Qirg‘iziston (1,4 tonna) tomonidan ham faol sotilgan.
WGC dunyo markaziy banklaridan 2021-yil oxirigacha jami oltin zaxirasini oshirishini kutmoqda. Birgina birinchi chorakda ular 100 tonnaga yaqin, ikkinchi chorakda esa deyarli 200 tonna xarid qilgan.
2021-yilning yanvar-noyabr oylarida oltin savdosi O‘zbekiston Markaziy bankiga 4,1 milliard dollar daromad keltirgan. Davlat statistika qo‘mitasi ma’lumotlariga ko‘ra, ushbu summaning 40 foizdan ortig‘i noyabr oyiga to‘g‘ri keladi.
O‘zbekiston eksportidagi noyob metallning ulushi 2020-yilning 11 oyida 40 foizdan 2021-yilning shu davridagi 26 foizga qisqargan. Biroq oltin respublikaning eng yirik eksport mahsuloti bo‘lib qolmoqda.
Eslatib o‘tamiz, O‘zbekistonning oltin-valyuta zaxiralari ilk bor 2021-yilning iyunida 35 milliard dollardan oshgandi.
Izoh (0)