Buxoro viloyati Kogon shahar ichki ishlar bo‘limi tomonidan jami 24 million 200 ming so‘mlik pul va texnik vositalar o‘g‘irlangani aniqlangan. Bu haqda “Daryo”ga xabar bergan viloyat IIB boshqarmasi matbuot xizmatining yozishicha, o‘g‘rilarning xatti-harakati xizmat iti tomonidan fosh qilingan.
Ta’kidlanishicha, Kogon shahar Buxoroshoh ko‘chasida joylashgan Silver study konsult MChJ rahbarining xizmat xonasida noma’lum shaxs tomonidan o‘g‘rilik sodir etilgan va u voqea joyidan yashiringan.
O‘rganishlarga ko‘ra, noma’lum shaxs jamiyat rahbari R.B.ga tegishli bo‘lgan bahosi 2 million 500 ming so‘mlik Lenovo rusumli noutbuk, 300 ming so‘mlik videokuzatuv moslamasi va uning xotirasi hamda 21 million 400 ming so‘m pullarni o‘g‘irlagan va jami 24 million 200 ming so‘mlik moddiy zarar yetkazgan.
Jamiyat rahbarining arizasiga ko‘ra, hodisa sodir bo‘lgan joyga tergov tezkor guruhi yetib borgan.
Tarkibdagi xodimlar orasida bo‘lgan kinolog Tal’at Ostonov o‘z tarbiyasidagi Lord laqabli xizmat iti yordamida tezkor qidiruv harakatlarini olib borgan. Xizmat iti noma’lum shaxsga tegishli iz va hid bilan bog‘liq ashyoviy dalillarni topgan.
“Lordda sezuvchanlik va sezgirlik xislatlarining yuqoriligi natijasida jinoyatni sodir qilgan shaxs Kogon tumanidagi “Beklar” mahallasida yashovchi fuqaro I.I. (1999-yilda tug‘ilgan) ekani fosh etildi. U ashyoviy dalillar bilan qo‘lga olindi”, — deydi Shuhrat Jalolov.
Mazkur holat yuzasidan I.I.ga nisbatan Jinoyat kodeksining 169-moddasi (o‘g‘rilik) 2-qismi bilan jinoyat ishi qo‘zg‘atilgan va ayni paytda dastlabki tergov harakatlari olib borilmoqda.
Izoh (0)