Kelajakda talabalar chegirma bilan onlayn tarzda chipta olishlari mumkin bo‘ladi. Bu haqda “O‘zbekiston temir yo‘llari” AJ bo‘lim boshlig‘i Fozil Sharipov 7 yanvar kuni bo‘lib o‘tgan Xalqaro press-klubda ma’lum qildi, deya xabar berdi “Daryo” muxbiri.
“O‘zbekiston temir yo‘llari” vakilining so‘zlariga ko‘ra, talabalar poyezdga chiptani onlayn tarzda xarid qilganda chegirma berilmaydi.
“Onlayn olingan chiptalar xuddi shunday tarzda qaytarilishi mumkin. Elektron chipta sotish 2017 yilning dekabr oyidan boshlab ishga tushirilgan. So‘nggi bir yil ichida bu jarayon 15 marta modernizatsiya qilindi. Bunda turli qo‘shimchalar kiritilyapti, yo‘lovchilarga elektron tarzda chipta sotib olishda qulaylik yaratilyapti”, — deydi Fozil Sharipov.
Uning so‘zlariga ko‘ra, kelajakda talabalar chegirma bilan onlayn tarzda chipta olishlari mumkin bo‘ladi.
Eslatib o‘tamiz, O‘zbekistonda talaba va o‘quvchilar uchun qishki ta’til 25-dekabrdan boshlangan edi. Ta’til 2022-yilning 10-yanvarigacha davom etishi va dars jarayonlari 11-yanvardan boshlanishi belgilangandi. Keyinroq oliy ta’lim muassasalarining talabalari, akademik litsey va hunar maktablari o‘quvchilari uchun qishki ta’til muddati 24-yanvargacha uzaytirildi. Bunga sabab qilib rektorlar, prorektorlar, dekanlar va moliya masalalariga mas’ullar uchun o‘z kasbiy mahoratini oshirish, yangicha tartibda ishlashni boshlash maqsadida 2022-yil 10—24-yanvar kunlari amaliy seminar-treninglar tashkil etilishi ko‘rsatilgan.
Qishki ta’til munosabati bilan Uzbekistan Airways va “O‘zbekiston temir yo‘llari” Yangi yil munosabati bilan maxsus chegirmalar e’lon qilgan. Keyinchalik talabalarga avia va temiryo‘l chiptalarni 24-yanvargacha bepul almashtirish imkoni berildi.
Izoh (0)