O‘zbekiston oliy ta’lim muassasalarida 1–2-kurs talabalari o‘qishni 3–4-kurslarga nisbatan vaqtliroq tugatadi. Bu haqda oliy va o‘rta maxsus ta’lim vaziri o‘rinbosari Komiljon Karimov 7-yanvar kuni bo‘lib o‘tgan Xalqaro press-klubda ma’lum qilindi, deya xabar bermoqda “Daryo” muxbiri.
Qishki ta’tilning uzaytirilishi talabalarning o‘quv muddatiga ta’sir ko‘rsatishi haqida berilgan savolga Komiljon Karimov shunday javob berdi:
“Bizda hozir ko‘pgina OTMlarda kredit-modul tizimi joriy etilgan. Bu tizim ayrim OTMlarda o‘tgan yilda ham joriy etilgandi. Bu, asosan, 1-2-kurslar uchun deyarli katta ta’sir ko‘rsatmaydi, chunki yangi tizimda o‘quv yili davomiyligi ilgarigi tizimda 38-40 o‘quv haftasi bo‘lgan bo‘lsa, bugungi kunda 30 hafta. O‘quv birinchi semestrda 15 hafta, ikkinchisida 15 hafta davom etadi”.
Vazir o‘rinbosarining qo‘shimcha qilishicha, 1–2-kurs talabalari o‘qishni 3–4-kurslarga nisbatan vaqtliroq tugatadi. Ularning o‘qish muddati iyun oyiga bormasdan yakuniga yetishi aytildi.
Shuningdek, Komiljon Karimov rektorlar, prorektorlar, dekanlar va moliya masalalariga mas’ullar uchun o‘tkazilishi rejalashtirilgan amaliy seminar-treninglarda kimlar o‘qituvchilik qilishi to‘g‘risidagi savolga ham javob berdi.
“Bugungi kunda respublika bo‘yicha 39 ta xorijiy OTMlarning filiallari bor. Bular orasida Singapur menejmentni rivojlantirish instituti, Toshkent Xalqaro Vestminster universiteti, Turin politexnika universiteti, Moskva davlat xalqaro aloqalar instituti kabilar bor. Dunyoda mashhur universitetlar bizda o‘z filiallarini ochishgan. Hozirda ular juda samarali faoliyat ko‘rsatyapti. Ularda kredit-modul tizimi, akademik, boshqaruv, moliyaviy mustaqillik nuqtayi nazaridan juda katta amaliy tajriba mavjud. U yerda ham xorijiy mutaxassislar bor, shuningdek, o‘zbekistonlik yetakchi mutaxassislar bor. Ko‘pgina xorijiy oliygohlarda o‘qib kelgan vatandoshlarimiz u yerlarda ishlashyapti. Biz ularni orasidan saralab olib, hozir o‘qituvchilar tayyorlayapmiz va ular dushanba, 10-yanvardan reja asosida dastlab rektorlarni, keyinchalik rektor o‘rinbosarlari, keyin esa dekan va boshqalarni o‘qitamiz”, — deydi oliy ta’lim vaziri o‘rinbosari.
Uning so‘zlariga ko‘ra, hozirda xorijda ishlab kelayotgan o‘zbekistonliklar bilan ham bog‘lanib, onlayn tarzda o‘quv seminarlarga jalb qilish rejalashtirilgan.
Eslatib o‘tamiz, O‘zbekistonda talaba va o‘quvchilar uchun qishki ta’til 25-dekabrdan boshlangan edi. Ta’til 2022-yilning 10-yanvarigacha davom etishi va dars jarayonlari 11-yanvardan boshlanishi belgilangandi. Keyinroq oliy ta’lim muassasalarining talabalari, akademik litsey va hunar maktablari o‘quvchilari uchun qishki ta’til muddati 24-yanvargacha uzaytirildi. Bunga sabab qilib rektorlar, prorektorlar, dekanlar va moliya masalalariga mas’ullar uchun o‘z kasbiy mahoratini oshirish, yangicha tartibda ishlashni boshlash maqsadida 2022-yil 10—24-yanvar kunlari amaliy seminar-treninglar tashkil etilishi ko‘rsatilgan.
Izoh (0)