Ўзбекистон олий таълим муассасаларида 1–2-курс талабалари ўқишни 3–4-курсларга нисбатан вақтлироқ тугатади. Бу ҳақда олий ва ўрта махсус таълим вазири ўринбосари Комилжон Каримов 7 январь куни бўлиб ўтган Халқаро пресс-клубда маълум қилинди, дея хабар бермоқда «Дарё» мухбири.
Қишки таътилнинг узайтирилиши талабаларнинг ўқув муддатига таъсир кўрсатиши ҳақида берилган саволга Комилжон Каримов шундай жавоб берди:
«Бизда ҳозир кўпгина ОТМларда кредит-модуль тизими жорий этилган. Бу тизим айрим ОТМларда ўтган йилда ҳам жорий этилганди. Бу, асосан, 1-2-курслар учун деярли катта таъсир кўрсатмайди, чунки янги тизимда ўқув йили давомийлиги илгариги тизимда 38-40 ўқув ҳафтаси бўлган бўлса, бугунги кунда 30 ҳафта. Ўқув биринчи семестрда 15 ҳафта, иккинчисида 15 ҳафта давом этади».
Вазир ўринбосарининг қўшимча қилишича, 1–2-курс талабалари ўқишни 3–4-курсларга нисбатан вақтлироқ тугатади. Уларнинг ўқиш муддати июнь ойига бормасдан якунига етиши айтилди.
Шунингдек, Комилжон Каримов ректорлар, проректорлар, деканлар ва молия масалаларига масъуллар учун ўтказилиши режалаштирилган амалий семинар-тренингларда кимлар ўқитувчилик қилиши тўғрисидаги саволга ҳам жавоб берди.
«Бугунги кунда республика бўйича 39 та хорижий ОТМларнинг филиаллари бор. Булар орасида Сингапур менежментни ривожлантириш институти, Тошкент Халқаро Вестминстер университети, Турин политехника университети, Москва давлат халқаро алоқалар институти кабилар бор. Дунёда машҳур университетлар бизда ўз филиалларини очишган. Ҳозирда улар жуда самарали фаолият кўрсатяпти. Уларда кредит-модуль тизими, академик, бошқарув, молиявий мустақиллик нуқтаи назаридан жуда катта амалий тажриба мавжуд. У ерда ҳам хорижий мутахассислар бор, шунингдек, ўзбекистонлик етакчи мутахассислар бор. Кўпгина хорижий олийгоҳларда ўқиб келган ватандошларимиз у ерларда ишлашяпти. Биз уларни орасидан саралаб олиб, ҳозир ўқитувчилар тайёрлаяпмиз ва улар душанба, 10 январдан режа асосида дастлаб ректорларни, кейинчалик ректор ўринбосарлари, кейин эса декан ва бошқаларни ўқитамиз», — дейди олий таълим вазири ўринбосари.
Унинг сўзларига кўра, ҳозирда хорижда ишлаб келаётган ўзбекистонликлар билан ҳам боғланиб, онлайн тарзда ўқув семинарларга жалб қилиш режалаштирилган.
Эслатиб ўтамиз, Ўзбекистонда талаба ва ўқувчилар учун қишки таътил 25 декабрдан бошланган эди. Таътил 2022 йилнинг 10 январигача давом этиши ва дарс жараёнлари 11 январдан бошланиши белгиланганди. Кейинроқ олий таълим муассасаларининг талабалари, академик лицей ва ҳунар мактаблари ўқувчилари учун қишки таътил муддати 24 январгача узайтирилди. Бунга сабаб қилиб ректорлар, проректорлар, деканлар ва молия масалаларига масъуллар учун ўз касбий маҳоратини ошириш, янгича тартибда ишлашни бошлаш мақсадида 2022 йил 10—24 январь кунлари амалий семинар-тренинглар ташкил этилиши кўрсатилган.
Изоҳ (0)