2021-yilda Prezident virtual qabulxonasi va Xalq qabulxonalariga 1,6 milliondan ortiq (oyda o‘rtacha 133 ming, kuniga o‘rtacha 4,4 mingdan ziyod) murojaat kelib tushgan. Prezident xalq qabulxonasining “Daryo”ga ma’lum qilishicha, ularning 53 foizi yoki 865 mingtasi ijobiy hal etilgan.
2021-yilda aholidan quyidagi masalalarda eng ko‘p murojaatlar kelib tushgan:
- ijtimoiy nafaqalar masalasi —190 mingta;
- ish bilan ta’minlash — 96 mingta;
- majburiy ijro faoliyati, aliment va qarz summalarini undirish — 94 mingta;
- bank kreditlari — 77 mingta;
- uy-joy bilan ta’minlash — 68 mingta.
Tahlillarga ko‘ra, 2021-yilda eng ko‘p murojaatlar Qashqadaryo viloyati hissasiga to‘g‘ri keldi — 197 mingta. Surxondaryo viloyatidan 181 mingta murojaat kelib tushgan. Toshkent shahridan esa 165 mingta murojaat qabul qilingan. Shuningdek, Toshkent (155 ming), Samarqand (150 ming) va Farg‘ona (145 ming) viloyatlaridan ham ko‘plab murojaatlar yo‘llangan.
Vazirlik va idoralar kesimida tahlil qilganda eng ko‘p murojaatlar Moliya vazirligiga oid bo‘lgan (173 mingta). Unga keyingi o‘rinlarda Ichki ishlar vazirligiga tegishli (122 mingta), Bandlik va mehnat munosabatlari vazirligiga taalluqli (105 mingta) murojaat kelib tushgan.
Bundan tashqari, 2021-yilda Majburiy ijro byurosi, Bosh prokuratura, Oliy sud hamda Markaziy bank va tijorat banklari tizimiga taalluqli murojaatlar soni ham ancha katta bo‘lgan.
2021-yilda viloyat, tuman va shaharlar sektorlari rahbarlari tomonidan Xalq qabulxonalari bilan hamkorlikda 31 927 ta sayyor ommaviy qabullar o‘tkazilgan. Ularda 223 412 nafar fuqaroning murojaati bo‘yicha 230 446 ta masalalari tinglanib, shundan 130 533 ta, ya’ni 56,6 foiz masalalar qanoatlantirilgan.
Shavkat Mirziyoyev raisligida 2021-yilning 23-iyulida o‘tkazilgan videoselektor yig‘ilishida aholi murojaatlari bilan ishlash tizimini yangicha tashkil qilish chora-tadbirlari ko‘rib chiqilib, sohada ko‘plab yangi mexanizmlarga start berilgandi. Prezident ushbu yig‘ilishda odamlarni murojaat qilishga majbur etayotgan ko‘plab muammolarni mahalla kesimida bartaraf etish taklifini ilgari surdi.
Ya’ni viloyat, tuman va shahar hokimlarining ayni yo‘nalishdagi mas’uliyati kuchaytirildi, aholi to‘g‘ridan to‘g‘ri tun-u kun murojaat qilishi uchun hokimlarning virtual qabulxonasi va ijtimoiy tarmoqlarda alohida sahifalarini tashkil etish vazifasi qo‘yildi. Murojaatlarning barchasi yagona elektron bazada jamlanib, Xalq qabulxonalari har chorakda davlat organlarining ochiq reytingini shakllantirishi belgilandi.
Ushbu yig‘ilishdan so‘ng shu kungacha hal etilmagan aholi murojaatlarini qayta o‘rganish ishlariga kirishildi. Shu tariqa qisqa vaqt ichida 651 mingdan ziyod murojaat qayta ko‘rib chiqilib, ularning 78 foizi yoki 506 ming 536 tasini ijobiy hal etishga erishildi.
Izoh (0)