Qashqadaryo viloyati hokimi Murodjon Azimovning og‘zaki topshirig‘iga binoan viloyat chegaralaridagi yo‘l-patrul xizmati postlaridan chigitni Samarqand viloyatiga olib o‘tish taqiqlangani to‘g‘risida xabar berilgandi. Viloyat hokimini qonunni buzishda ayblagan Kattaqo‘rg‘on shahri hokimi Gavhar Alimova talabi 10 kun muddatda bajariladigan bo‘ldi. Bu haqda respublikada faoliyat yurituvchi internet nashrlariga javob xati yozgan “Oqsaroy klaster” MChJ direktoriga tayanib, “Daryo” muxbiri xabar berdi.
Ma’lum bo‘lishicha, MChJ mas’ullari respublikada faoliyat yurituvchi internet nashrlari va blogerlarga xat yozib, chigit mojarosi qanday yakun topishi haqida ma’lumot bergan. Qayd etilishicha, Samarqandga yuborilgan va yo‘lda ushlab qolingan chigit urug‘lik chigit bo‘lib, shu sababdan viloyatdan olib chiqilishiga yo‘l qo‘yilmagan.
“‘Oqsaroy klaster’ MChJ mas’ul xodimlarining e’tiborsizligi natijasida bugungi kunda zaxirada saqlanayotgan 2022-yil paxta hosili uchun ekilishi rejalashtirilgan urug‘lik chigiti yuklab yuborilgan. ‘Oqsaroy klaster’ MChJ tomonidan ushbu xatolikka yo‘l qo‘ygan mas’ul xodimlarga nisbatan intizomiy jazo choralari ko‘rilgan holda kelib chiqqan kamchiliklarni bartaraf etish maqsadida chigit yuklangan yuk avtomashinalarini ‘Umakay’ muntazam yo‘l-patrul maskanida ma’lum muddatga to‘xtatib turish to‘g‘risida xabar qilindi”, — deyiladi klaster korxonaning internet nashrlariga yo‘llangan xatida.
Klasterning qo‘shimcha qilishicha, klaster zaxira urug‘lik chigitini qaytarib olib, Samarqanddagi “Marokand gold oil extraksiya” MChJ yog‘ korxonasiga 10 kun muddatda birja savdolari orqali yutib olingan texnik chigitni yetkazib beradi. Shuningdek, yuzaga kelgan barcha xarajatlarni o‘z hisobidan qoplaydi.
Eslatib o‘tamiz, 2-yanvar kuni Samarqand viloyati Kattaqo‘rg‘on shahri hokimi, senator Gavhar Alimova shaharda qariyb 100 ta ish o‘rni yaratgan “Marokand gold oil extraksiya” korxonasi muammoga duch kelganini yozgandi. 28-dekabr kuni kompaniya rahbari Saydin Ro‘ziyev shahar hokimiyatiga kelib, tovar va xomashyo birjasidan ochiq savdolar asosida sotib olingan 100 tonna chigit mahsulotini Qashqadaryodan Samarqandga olib kela olmayotganini ma’lum qilgan. Qashqadaryo viloyati hokimligiga ko‘ra, chigit ortilgan yuk mashinalari “QR-kodli hisobvaraq-fakturasi bo‘lmagani” sababli to‘xtatib qo‘yilgan.
Izoh (0)