Antimonopoliya qo‘mitasi Qashqadaryo hududidan chigitni olib chiqishga taqiq qo‘yilgani bo‘yicha o‘rganishlar olib borilayotganini ma’lum qildi

Qashqadaryo viloyati hokimi Murotjon Azimovning og‘zaki topshirig‘iga binoan viloyat chegaralaridagi yo‘l-patrul xizmati postlaridan chigitni Samarqand viloyatiga olib o‘tish taqiqlangani to‘g‘risida xabar berilgandi. Monopoliyaga qarshi kurashish qo‘mitasi tomonidan ushbu holat nazoratga olingan bo‘lib, chigitni “Umekey” postidan o‘tkazilmayotgani yuzasidan Qashqadaryo viloyati hokimligi va viloyat IIBga so‘rovnoma yuborilgan.

Eslatib o‘tamiz, 2020-yilda ham 3 ta viloyatda bu kabi holat kuzatilgan. Qo‘mita tomonidan 2020-yil 27-noyabrda “Raqobat to‘g‘risida”gi qonunining 12-moddasi talablari buzilganligi holati yuzasidan Vazirlar Mahkamasining 2005-yil 12-oktabrdagi 225-sonli qaroriga muvofiq Qashqadaryo, Xorazm va Surxondaryo viloyat hokimliklariga hamda ushbu viloyatlarning IIBlariga nisbatan Qo‘mita tomonidan 2020-yil 27-noyabrda ish qo‘zg‘atilgan edi. Qonunchilik talablari buzilgani o‘z tasdig‘ini topgani sababli hokimliklarga va viloyatlarning IIBlariga nisbatan qo‘mitaning qarori qabul qilingan va ko‘rsatmasi berilgan edi.

Ta’kidlanishicha, shunga qaramay, Qashqadaryo viloyatida bu kabi holat qayta kuzatilmoqda. Hozirgi kunda Qashqadaryo viloyatining tegishli korxonalari tomonidan birja savdolariga qo‘yilgan chigit mahsulotlari birja orqali tadbirkorlik subyektlari tomonidan sotib olinganiga qaramay, ushbu chigit mahsulotlarini viloyat hududidan olib chiqishda to‘siqlar borligi noroziliklarga sabab bo‘lyapti.

“Holat yuzasidan qo‘mitaga ham murojaatlar kelib tushgan. Ushbu murojaatlar Jismoniy va yuridik shaxslarning hamda Monopoliyaga qarshi qonunchilik hujjatlari doirasida chora ko‘rish uchun o‘rganilmoqda. Holat yuzasidan qo‘shimcha ma’lumot beriladi”, — deyiladi qo‘mita munosabatida.

2-yanvar kuni Samarqand viloyati Kattaqo‘rg‘on shahri hokimi, senator Gavhar Alimova shaharda qariyb 100 ta ish o‘rni yaratgan Marokand gold oil extraksiya korxonasi muammoga duch kelganini yozgandi. 28-dekabr kuni kompaniya rahbari Saydin Ro‘ziyev shahar hokimiyatiga kelib, tovar va xomashyo birjasidan ochiq savdolar asosida sotib olingan 100 tonna chigit mahsulotini Qashqadaryodan Samarqandga olib kela olmayotganini ma’lum qilgan. Qashqadaryo viloyati hokimligiga ko‘ra, chigit ortilgan yuk mashinalari “QR-kodli hisobvaraq-fakturasi bo‘lmagani” sababli to‘xtatib qo‘yilgan.