Birlashgan Millatlar Tashkiloti qishning noqulay ob-havosi bilan bog‘liq holda Afg‘onistondagi gumanitar vaziyat yomonlashganini ma’lum qildi. Bu haqda “Interfaks” xabar berdi.
“Qish mavsumida afg‘onistonliklarning gumanitar yordamga bo‘lgan ehtiyoji ortib bormoqda, butun mamlakat bo‘ylab millionlab odamlar to‘yib ovqatlanmaydi, ular sovuqdan aziyat chekmoqda. Kuchli qor yog‘ishi tufayli aksariyat afg‘on oilalari tashqi yordamdan uzilgan”, — deyiladi BMT saytidagi bayonotda.
Birlashgan Millatlar Tashkilotining Gumanitar masalalarni muvofiqlashtirish boshqarmasi (OCHA) ma’lumotlariga ko‘ra, kuchli qor va yomg‘ir oqibatida Kobul aeroportiga kiruvchi va chiquvchi parvozlar to‘xtatilgan.Qayd etilishicha, yaqin kunlarda ham mamlakatda qor yog‘ishi davom etadi, havo harorati pasayadi. BMT agentliklari afg‘onistonliklar uchun gumanitar yordam hajmini oshirmoqda, muhtojlarga oziq-ovqat yuborilib, tibbiy yordam ko‘rsatilmoqda.
“Gumanitar vaziyat, ayniqsa, 2021-yilning avgust oyida ‘Tolibon’ hokimiyatni egallab olganidan so‘ng va shu munosabat bilan yordamning to‘xtab qolishi hamda mamlakat aktivlarning muzlatilishi ortidan kundan kunga yomonlashmoqda. Aksariyat afg‘on oilalari sovuq uylarda yashaydi, ularda uyini isitish uchun hech narsa yo‘q”, — deyiladi xabarda.
Gumanitar tashkilotlar ko‘plab hududlarga yordam yetkazish imkoniyati butunlay uzilgunga qadar ko‘mak ko‘rsatish uchun barcha zarur choralarni ko‘rmoqda.
1-sentabrdan buyon Afg‘onistondagi gumanitar hamkorlar 9 million kishiga oziq-ovqat bo‘yicha yordam ko‘rsatdi, 201 ming bola to‘yib ovqatlanmaslik oqibatidagi kasalliklardan davolandi, 4 million kishiga tibbiy yordam, 110 ming kishiga qishga tayyorgarlik uchun yordam ko‘rsatildi.
Izoh (0)