AQSh Davlat departamenti Qozog‘iston hukumati va norozilik namoyishchilarini mamlakatida favqulodda holat e’lon qilinishi oqibatida yuzaga kelgan vaziyatdan chiqishga birgalikda yechim topishga chaqirdi.
“AQSh qimmatli hamkorimiz hisoblanuvchi Qozog‘istondagi vaziyatni diqqat bilan kuzatib bormoqda. Biz zo‘ravonlik aktlari va mulklarni yakson qilinishini qoralaymiz hamda hukumatni, ham namoyishchilarni vazmin bo‘lishga chaqiramiz”, — deyiladi Davlat departamenti vakili Ned Praysning rasmiy bayonotida.
“Biz tomonlarning barchasini favqulodda vaziyatdan chiqishning tinch yechimini topishga chaqiramiz”, — deyiladi bayonotda.
Qozog‘istonda norozilik namoyishlari suyultirilgan gaz narxi ikki baravarga (60 tengedan 120 tengega) ko‘tarilganidan so‘ng boshlandi. 4-yanvar kuni Qozog‘istonda politsiya hamda gaz narxining keskin oshganiga qarshi chiqayotgan namoyishchilar o‘rtasida to‘qnashuvlar kuzatildi.
Keyinchalik gaz narxi tushirilgani ma’lum qilindi. Qozog‘iston prezidenti Qosim-Jo‘mart To‘qayev namoyish o‘tkazayotganlardan provokatsiyaga uchmaslikni so‘ragan, miting o‘tkazishning ham o‘z qonun-qoidalari borligini, ayniqsa hissiyotga beriladigan yoshlar qaltis va qonunga zid harakatlar bilan o‘z kelajagiga salbiy ta’sir ko‘rsatib qo‘yishi mumkinligi haqida ogohlantirgan.
Mamlakatda vaziyat baribir keskinlashishda davom etdi va Qozog‘iston prezidenti hukumat iste’fosini qabul qildi. 5-yanvarning ikkinchi yarmida To‘qayev Qozog‘iston xalqiga yana videomurojaat yo‘lladi va Xavfsizlik kengashi raisining vakolatlarini ham qabul qilib olgani, mamlakatdagi namoyishlar ortida moliyaviy qo‘llab-quvvatlanayotgan fitnachilar turganini ma’lum qildi.
To‘qayev fuqarolarga yo‘llagan murojaatida mamlakatdagi ommaviy tartibsizliklar paytida halok bo‘lganlar va jarohatlanganlar borligini ham aytgan.
Izoh (0)