Бирлашган Миллатлар Ташкилоти қишнинг ноқулай об-ҳавоси билан боғлиқ ҳолда Афғонистондаги гуманитар вазият ёмонлашганини маълум қилди. Бу ҳақда «Интерфакс» хабар берди.
«Қиш мавсумида афғонистонликларнинг гуманитар ёрдамга бўлган эҳтиёжи ортиб бормоқда, бутун мамлакат бўйлаб миллионлаб одамлар тўйиб овқатланмайди, улар совуқдан азият чекмоқда. Кучли қор ёғиши туфайли аксарият афғон оилалари ташқи ёрдамдан узилган», — дейилади БМТ сайтидаги баёнотда.
Бирлашган Миллатлар Ташкилотининг Гуманитар масалаларни мувофиқлаштириш бошқармаси (ОCHА) маълумотларига кўра, кучли қор ва ёмғир оқибатида Кобул аэропортига кирувчи ва чиқувчи парвозлар тўхтатилган.Қайд этилишича, яқин кунларда ҳам мамлакатда қор ёғиши давом этади, ҳаво ҳарорати пасаяди. БМТ агентликлари афғонистонликлар учун гуманитар ёрдам ҳажмини оширмоқда, муҳтожларга озиқ-овқат юборилиб, тиббий ёрдам кўрсатилмоқда.
«Гуманитар вазият, айниқса, 2021 йилнинг август ойида ‘Толибон’ ҳокимиятни эгаллаб олганидан сўнг ва шу муносабат билан ёрдамнинг тўхтаб қолиши ҳамда мамлакат активларнинг музлатилиши ортидан кундан кунга ёмонлашмоқда. Аксарият афғон оилалари совуқ уйларда яшайди, уларда уйини иситиш учун ҳеч нарса йўқ», — дейилади хабарда.
Гуманитар ташкилотлар кўплаб ҳудудларга ёрдам етказиш имконияти бутунлай узилгунга қадар кўмак кўрсатиш учун барча зарур чораларни кўрмоқда.
1 сентябрдан буён Афғонистондаги гуманитар ҳамкорлар 9 миллион кишига озиқ-овқат бўйича ёрдам кўрсатди, 201 минг бола тўйиб овқатланмаслик оқибатидаги касалликлардан даволанди, 4 миллион кишига тиббий ёрдам, 110 минг кишига қишга тайёргарлик учун ёрдам кўрсатилди.
Изоҳ (0)