Kongoda sharqida joylashgan dunyodagi eng faol vulqonlardan biri hisoblanuvchi Nyiragongo osmonga qora tutun va vulqon kulini otishni boshladi, deb xabar beradi BBC.
Kuzatuvchilar Nyiragongoning asosiy krateridagi harorat Selsiy bo‘yicha 400 darajaga yetganini va yerosti silkinishlari sezilarli darajada ortganini qayd etgan.
Shu bilan birga, Selestin Kasereka observatoriyasi rahbari vulqonning otilish ehtimoli hozicha juda kamligini, biroq vulqon tutuni va kuli aholi sog‘lig‘iga xavf tug‘dirishi mumkinligini ma’lum qilgan.
“Aholiga xotirjamlikni saqlash tavsiya etilmoqda, biroq odamlar qo‘rquvda, chunki ular 2021-yilning mayida otilgan vulqonning halokatli oqibatlarini hanuzgacha unutgani yo‘q”, — deyiladi xabarda. O‘shanda tabiiy ofat oqibatida 32 kishi halok bo‘lgan, minglab odamlar yangi boshpana qidirishga majbur bo‘lgandi. Fuqarolarning aksariyati qo‘shni Ruandaga qochgan bo‘lsa, ayrimlari hamon Goma shahridagi vaqtincha lagerda yashab kelmoqda.
Ma’lumot uchun, ushbu vulqon 1882-yildan buyon 34 marta otilgan. Nyiragongoning eng kuchli otilishlaridan biri 1977-yilda qayd etilgan, o‘shanda 600 dan ortiq odam halok bo‘lgan.
Izoh (0)