Qozog‘istonda banklarning barchasi ishlashdan vaqtinchalik to‘xtadi. Bu haqda respublika Milliy bankining rasmiy vakili Oljas Ramazonovga tayanib, “Interfaks” xabar berdi.
Ramazonovning so‘zlariga ko‘ra, “huquq-tartibot idoralari tomonidan aksilterror operatsiyalar o‘tkazilayotgani hamda internet ishidagi vaqtinchalik uzilishlar hisobga olingan holda, shuningdek, moliya institutlari xodimlari va moliyaviy xizmatlar iste’molchilarining salomatligi hamda hayotini himoya qilish uchun barcha moliya tashkilotlarining faoliyati vaqtincha to‘xtatilgan.
Qozog‘istonda internet uzilgani sababli 5-yanvardan naqd pulsiz to‘lovlarni amalga oshirishning iloji bo‘lmayapti.
NetBlocks servisi ma’lumotlariga ko‘ra, Qozog‘iston bo‘ylab internet uzib qo‘yilgan. Mobil aloqa ham deyarli ishlamayapti. Shuningdek, bir qancha telekanallarning efiri to‘xtatilgan.
Qozog‘istondagi bir qancha zavod, fabrika va korxonalar ham faoliyatini to‘xtatgan, xususan, Qorag‘anda viloyati Balxash shahridagi Metallurgiya zavodi ham yopilgan.
5-yanvar kuni Qozog‘iston hukumati butun mamlakat bo‘ylab favqulodda holat e’lon qildi.
Qozog‘istondagi vaziyat 2-yanvar kuni Janao‘zen shahrida (Mang‘istau viloyatidagi shahar) suyultirilgan gaz narxining ikki baravar oshishiga qarshi mitinglar boshlanganidan so‘ng keskinlashdi. Chiqishlar iqtisodiy va siyosiy talablar bilan butun mamlakat bo‘ylab ommaviy norozilik namoyishlariga aylanib ketdi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi.
Qozog‘iston prezidenti Qosim-Jo‘mart To‘qayev mamlakatdagi ommaviy tartibsizliklar paytida halok bo‘lganlar va jarohatlanganlar borligini aytdi.
Izoh (0)