Антимонополия қўмитаси Қашқадарё ҳудудидан чигитни олиб чиқишга тақиқ қўйилгани бўйича ўрганишлар олиб борилаётганини маълум қилди

Қашқадарё вилояти ҳокими Муротжон Азимовнинг оғзаки топшириғига биноан вилоят чегараларидаги йўл-патруль хизмати постларидан чигитни Самарқанд вилоятига олиб ўтиш тақиқлангани тўғрисида хабар берилганди. Монополияга қарши курашиш қўмитаси томонидан ушбу ҳолат назоратга олинган бўлиб, чигитни «Умекей» постидан ўтказилмаётгани юзасидан Қашқадарё вилояти ҳокимлиги ва вилоят ИИБга сўровнома юборилган.

Эслатиб ўтамиз, 2020 йилда ҳам 3 та вилоятда бу каби ҳолат кузатилган. Қўмита томонидан 2020 йил 27 ноябрда «Рақобат тўғрисида»ги қонунининг 12-моддаси талаблари бузилганлиги ҳолати юзасидан Вазирлар Маҳкамасининг 2005 йил 12 октябрдаги 225-сонли қарорига мувофиқ Қашқадарё, Хоразм ва Сурхондарё вилоят ҳокимликларига ҳамда ушбу вилоятларнинг ИИБларига нисбатан Қўмита томонидан 2020 йил 27 ноябрда иш қўзғатилган эди. Қонунчилик талаблари бузилгани ўз тасдиғини топгани сабабли ҳокимликларга ва вилоятларнинг ИИБларига нисбатан қўмитанинг қарори қабул қилинган ва кўрсатмаси берилган эди.

Таъкидланишича, шунга қарамай, Қашқадарё вилоятида бу каби ҳолат қайта кузатилмоқда. Ҳозирги кунда Қашқадарё вилоятининг тегишли корхоналари томонидан биржа савдоларига қўйилган чигит маҳсулотлари биржа орқали тадбиркорлик субъектлари томонидан сотиб олинганига қарамай, ушбу чигит маҳсулотларини вилоят ҳудудидан олиб чиқишда тўсиқлар борлиги норозиликларга сабаб бўляпти.

«Ҳолат юзасидан қўмитага ҳам мурожаатлар келиб тушган. Ушбу мурожаатлар Жисмоний ва юридик шахсларнинг ҳамда Монополияга қарши қонунчилик ҳужжатлари доирасида чора кўриш учун ўрганилмоқда. Ҳолат юзасидан қўшимча маълумот берилади», — дейилади қўмита муносабатида.

2 январь куни Самарқанд вилояти Каттақўрғон шаҳри ҳокими, сенатор Гавҳар Алимова шаҳарда қарийб 100 та иш ўрни яратган Мароканд голд оил эхтракция корхонаси муаммога дуч келганини ёзганди. 28 декабрь куни компания раҳбари Сайдин Рўзиев шаҳар ҳокимиятига келиб, товар ва хом ашё биржасидан очиқ савдолар асосида сотиб олинган 100 тонна чигит маҳсулотини Қашқадарёдан Самарқандга олиб кела олмаётганини маълум қилган. Қашқадарё вилояти ҳокимлигига кўра, чигит ортилган юк машиналари «QR-кодли ҳисобварақ-фактураси бўлмагани» сабабли тўхтатиб қўйилган.