Prezident Shavkat Mirziyoyev “2022-yil uchun O‘zbekiston Respublikasining davlat budjeti to‘g‘risida”gi qonunni imzoladi. Hujjat bilan mol-mulkni ijaraga beruvchi jismoniy shaxslar uchun belgilangan ijara to‘lovining eng kam stavkalari belgilangan, deb xabar beradi Davlat soliq qo‘mitasi matbuot xizmati.
Toshkentda 2022-yilda turar joy binolari uchun ijaraning eng kam stavkasi 1 kvadrat metr uchun oyiga 15,5 ming so‘m etib belgilangan. Viloyat markazlari va Nukus shahrida ushbu narx 9,5 ming so‘m, boshqa aholi punktlarida esa 4 ming so‘mni tashkil etadi.
Yengil avtomobil transportini (yo‘lovchilarni, yuklarni tashish uchun mo‘ljallangan transport vositasi, 8 o‘rindiqdan ko‘p bo‘lmagan, haydovchi o‘rindig‘ini hisobga olmaganda) ijaraga berishning minimal stavkasi 650 ming so‘m (2021-yil uchun 575 ming so‘m) etib belgilandi.
Shu bilan birga, mikroavtobuslar, avtobuslar va yuk mashinalari uchun ijara haqining minimal miqdori 1 250 000 so‘mni (2021-yil uchun 1 150 000 so‘m edi) tashkil etishi kutilmoqda.
Shuningdek, qonun bilan tovarlarning ayrim turlari bilan chakana savdo qilish huquqi uchun yig‘imlarning cheklangan stavkalari, chet davlatlar avtotransport vositalarining O‘zbekiston hududiga kirgani va uning hududi orqali tranziti uchun yig‘imlarning stavkalari tasdiqlangan.
Avvalroq O‘zbekistonda yuridik shaxslar ham avtomobillarni qisqa muddatga ijaraga olishi mumkin bo‘lgani to‘g‘risida xabar berilgandi.
Izoh (0)