Qashqadaryo viloyati hokimi Murotjon Azimovning og‘zaki topshirig‘iga binoan viloyat chegaralaridagi yo‘l-patrul xizmati postlaridan chigitni Samarqand viloyatiga olib o‘tish taqiqlangani to‘g‘risida xabar berilgandi. Qashqadaryo viloyati hokimligi mazkur holatga munosabat bildirib, chigitlar ortilgan yuk mashinalari nima sababdan to‘xtatilganini ma’lum qildi.
2-yanvar kuni Samarqand viloyati Kattaqo‘rg‘on shahri hokimi, senator Gavhar Alimova shaharda qariyb 100 ta ish o‘rni yaratgan Marokand gold oil extraksiya korxonasi muammoga duch kelganini yozgandi. 28-dekabr kuni kompaniya rahbari Saydin Ro‘ziyev shahar hokimiyatiga kelib, tovar va xomashyo birjasidan ochiq savdolar asosida sotib olingan 100 tonna chigit mahsulotini Qashqadaryodan Samarqandga olib kela olmayotganini ma’lum qilgan.
Qashqadaryo viloyati hokimligi matbuot xizmatining yozishicha, haqiqatan ham 2021-yil 28-dekabr kuni Chiroqchi tumanidagi “Umakay” postida Yo‘l harakati xavfsizligi xodimlari tomonidan chigit mahsuloti ortilgan 3 ta yuk transport vositalari to‘xtatilgan.
Ichki ishlar xodimlariga o‘zini chigitni olib ketayotgan korxona ekspeditori deb tanishtirgan Komil ismli shaxs qog‘oz shaklidagi 94 tonna chigit mahsulotini “Oq saroy klaster” MChJdan Marokand gold oil extraksiya MChJga jo‘natilgani haqida qo‘lda yozilgan (QR-kodga ega bo‘lmagan) yuk xatini taqdim qilgan.
Lekin taqdim etilgan hujjatlar orasida elektron hisobvaraq-faktura, birja savdosidan yutib olganligi to‘g‘risida elektron “Tiket”, shartnoma va ishonchnoma bo‘lmagan.
Ta’kidlanishicha, Vazirlar Mahkamasining 2020-yil 14-avgustdagi 489-son qarori 2-ilovasi 67-bandida “Tovarlar transport vositasida tashilganda elektron shaklda rasmiylashtirilgan hisobvaraq-faktura QR-kodga ega bo‘lgan elektron tarzda yoki qog‘oz nusxasi chop etilgan holda tashuvchiga taqdim etilishi” belgilangan.
Marokand gold oil extraksiya MChJ olib ketayotgan chigit mahsuloti bo‘yicha QR-kodga ega bo‘lgan hisobvaraq-faktura bo‘lmagani va taqdim etilgan hujjatlarda shubha tug‘ilgani sababli 3 ta yuk transport vositalaridagi chigit mahsulotlari qonuniy ravishda vaqtincha saqlovga olingan.
Shundan so‘ng, Marokand gold oil extraksiya xodimlari qachonki ichki ishlar xodimlari yukni to‘xtatib o‘rganishni boshlaganidan 1 sutkadan so‘ng, ya’ni 29-dekabr kuni soat 17:31 da “Oq saroy klaster” MChJ tomonidan rasmiylashtirilib, Marokand gold oil extraksiya’ga 98,3 tonna chigit yuborilgani, lekin sotib oluvchi tomonidan hanuzgacha elektron imzo bilan tasdiqlanmagan elektron hisobvaraq-fakturasining qog‘oz nusxasini taqdim etmagan.
“Respublikamizda soliq qonunchiligi takomillashib, Vazirlar Mahkamasining 489-son qarori bilan Davlat soliq qo‘mitasida qo‘shilgan qiymat solig‘idan qochishning oldini olish va to‘g‘ri hisoblash uchun elektron hisobvaraq-fakturalarning axborot tizimi yaratilgan. Ya’ni har bir soliq to‘lovchi elektron axborot tizimi orqali sotilgan tovarni xaridorga jo‘natishdan avval elektron hisobvaraq-faktura rasmiylashtirishi, oluvchi ham elektron imzo bilan qabul qilganligini tasdiqlashi lozim. Bu hisobvaraq-fakturalar Davlat soliq qo‘mitasidagi elektron hisobvaraq-fakturalarning axborot tizimida shakllanadi va qo‘shilgan qiymat solig‘i hisoblash uchun asos bo‘ladi.
Elektron hisobvaraq-fakturasisiz, qo‘lda yozilgan qog‘oz yuk xati bilan tovarlarni realizatsiya qilish shubhali bo‘lib, yuk xati faqatgina ortilgan tovarning yo‘ldagi tekshiruvlari uchungina foydalanilib, keyinchalik yo‘qotilishi orqali soliqdan qochish ehtimoli katta”, — deyiladi munosabatda.
“Tezkor qidiruv tadbirlari oshkora va nooshkora usullarda o‘tkazilgani sababli ayrim holatlar oshkor etilmaydi”, — deyiladi xabarda.
Eslatib o‘tamiz, 2020-yilning noyabrida Qashqadaryo, Surxondaryo va Xorazm viloyatlari hokimlarining og‘zaki ko‘rsatmasiga binoan postlardagi yo‘l patrul xizmati tomonidan paxta chigitini bir viloyatdan boshqa viloyatga olib o‘tish taqiqlangandi. Monopoliyaga qarshi kurashish qo‘mitasining aralashuvidan so‘ng, taqiqlar olib tashlangan edi.
Ma’lumot uchun, 2021–2018-yilning fevralidan buyon Davlat bojxona qo‘mitasi raisi lavozimida ishlab kelayotgan Murotjon Azimov prezident farmoni bilan Qashqadaryo viloyati hokimi vazifasini bajaruvchi etib tayinlangan.
Izoh (0)