Samarqand viloyati Bulung‘ur tumanida tovlamachilik bilan shug‘ullanib kelayotgan guruh faoliyatiga chek qo‘yildi, deb xabar beradi viloyati IIB axborot xizmati.
Samarqand viloyati IIB Terrorizm va ekstremizmga qarshi kurash boshqarmasi xodimlari tomonidan “Bulung‘ur dehqon bozori” hududida ikki nafar shaxsning fuqarolardan litsenziyasiz kirakashlik faoliyati bilan shug‘ullanayotgani uchun doimiy ravishda tovlamachilik yo‘li bilan pul talab qilib kelayotgani to‘g‘risida ma’lumot olingan.
Mazkur holat bo‘yicha 2021-yil 23-dekabr kuni Bulung‘ur tumani “Bulung‘ur” dehqon bozori oldida Samarqand viloyati IIB hamda DXX Samarqand viloyati boshqarmasi xodimlari tomonidan tezkor tadbir o‘tkazilgan. Tadbirda I.K. ismli shaxs fuqaro I.dan kunlik talab qilib kelayotgan 40 ming so‘m pulni olgan vaqtida daliliy ashyolar bilan ushlangan.
Fuqarolar I.K. va A.K. Bulung‘ur tuman IIBga olib kelinib, xolislar ishtirokida yon cho‘ntaklari ko‘zdan kechirilganda, ulardan tadbir uchun ishlatilgan maxsus ishlov berilgan pullar ekani aniqlanib, hujjatlashtirib olingan.
Shuningdek, I.K. va A.K. bilan olib borilgan surishtiruv ishlari davomida ular “Gulbahor opa trans” MChJ xodimlari 17 ta taksi avtomashinalariga ruxsati bo‘lishiga qaramasdan, 100 ga yaqin taksi avtomashinalardan kunlik 40 ming so‘mdan pul mablag‘larini noqonuniy ravishda undirib, MChJning rahbari X.G.ga berib kelishini va o‘zlarining shaxsiy manfaatlari yo‘lida ishlatib kelayotganini ma’lum qilgan.
Surishtiruv ishlari davomida ushbu “Gulbahor opa trans” MChJda pul terish ishlari bilan shug‘ullanuvchi yana 3 nafar fuqaro — X.Sh., H.S. va B.A. aniqlanib, tuman IIBga olib kelingan.
Bundan tashqari, o‘tkazilgan tezkor tadbir davomida Bulung‘ur tumani markazida joylashgan bekatlarda pul yig‘ish bilan shug‘ullanuvchi J.B. ismli shaxs ham aniqlangan. U bilan olib borilgan tezkor surishtiruv ishlari davomida J.B. “Bahora avto yo‘lovchi” XKda ishlashini va yo‘nalishiga qarab kunlik “stoyanka” haqi uchun har bir avtomashinadan kunlik 2-4 ming so‘mgacha, litsenziyasiz faoliyat olib borishlari uchun esa har bir avtomashina egasidan kunlik 20-50 ming so‘mgacha naqd pul mablag‘larini terib olishini va jamiyat rahbari E.A.ga topshirishini ma’lum qilgan.
Shundan so‘ng “Bahora avto yo‘lovchi” XK direktori E.A. ushlanib, shaxsiy tintuv qilinganda uning yonidan taksi avtomashinalarini yozib boruvchi daftar, ruchka va 670 ming so‘m pul borligi aniqlanib, xolislar ishtirokida rasmiylashtirib olingan.
Mazkur holatlar bo‘yicha olib borilayotgan tergovga qadar tekshiruv davomida I.K. va uning ukasi A.K. bir guruh bo‘lishib, 2021-yil 28-avgust kuni soat 13:30 larda jamoat joyi hisoblangan Bulung‘ur tumani “Mehrjon” mahallasi hududida jamiyatda o‘rnatilgan odob-axloq normalariga zid ravishda yurish-turish qoidalarini qasddan mensimasdan, hech bir sababsiz fuqaro D.R.ning tanasining turli sohalariga urib-do‘pposlashib, unga tan jarohati yetkazishgani aniqlangan.
Mazkur holat yuzasidan Bulung‘ur tuman IIB huzuridagi Tergov bo‘limi tomonidan I.K. va A.K. ga nisbatan Jinoyat kodeksining 165-moddasi (tovlamachilik) 2-qismi “v” bandi va 277-moddasi (bezorilik) 2-qismi “b” bandi bilan bilan jinoyat ishi qo‘zg‘atilib, gumon qilinuvchilar ushlangan.
Tadbirning qolgan 6 nafar ishtirokchilariga nisbatan 15 sutkadan ma’muriy qamoq jazosi tayinlangan.
Avvalroq Yunusobod dehqon bozori yaqinidagi sotuvchilardan har oy pul undirib kelgan ayol qo‘lga olingani, Namanganda tadbirkorlarni “shantaj” qilib, ulardan pul olib kelgan ayol ushlangani, Toshkent viloyatidagi “G‘ishtko‘prik” chegara postida talon-torojlik qilayotgan uyushgan guruh borligi aytilayotgani to‘g‘risida xabar berilgandi.
Izoh (0)