Президент Шавкат Мирзиёев «2022 йил учун Ўзбекистон Республикасининг давлат бюджети тўғрисида»ги қонунни имзолади. Ҳужжат билан мол-мулкни ижарага берувчи жисмоний шахслар учун белгиланган ижара тўловининг энг кам ставкалари белгиланган, деб хабар беради Давлат солиқ қўмитаси матбуот хизмати.
Тошкентда 2022 йилда турар жой бинолари учун ижаранинг энг кам ставкаси 1 квадрат метр учун ойига 15,5 минг сўм этиб белгиланган. Вилоят марказлари ва Нукус шаҳрида ушбу нарх 9,5 минг сўм, бошқа аҳоли пунктларида эса 4 минг сўмни ташкил этади.
Енгил автомобиль транспортини (йўловчиларни, юкларни ташиш учун мўлжалланган транспорт воситаси, 8 ўриндиқдан кўп бўлмаган, ҳайдовчи ўриндиғини ҳисобга олмаганда) ижарага беришнинг минимал ставкаси 650 минг сўм (2021 йил учун 575 минг сўм) этиб белгиланди.
Шу билан бирга, микроавтобуслар, автобуслар ва юк машиналари учун ижара ҳақининг минимал миқдори 1 250 000 сўмни (2021 йил учун 1 150 000 сўм эди) ташкил этиши кутилмоқда.
Шунингдек, қонун билан товарларнинг айрим турлари билан чакана савдо қилиш ҳуқуқи учун йиғимларнинг чекланган ставкалари, чет давлатлар автотранспорт воситаларининг Ўзбекистон ҳудудига киргани ва унинг ҳудуди орқали транзити учун йиғимларнинг ставкалари тасдиқланган.
Аввалроқ Ўзбекистонда юридик шахслар ҳам автомобилларни қисқа муддатга ижарага олиши мумкин бўлгани тўғрисида хабар берилганди.
Изоҳ (0)