O‘zbekistonda 2022-yilda bir qator muhim xalqaro uchrashuv va tadbirlar o‘tkazilishi rejalashtirilgan, deb xabar bermoqda Anadolu axborot agentligi.
Qayd etilishicha, O‘zbekistonda Turkiy davlatlar tashkiloti va Shanxay hamkorlik tashkilotiga a’zo davlatlar rahbarlarining sammitlari, shuningdek, Mustaqil Davlatlar Hamdo‘stligining birinchi mintaqalararo forumi bo‘lib o‘tadi.
Turkiy davlatlar tashkiloti
Turkiy davlatlar tashkilotining (sobiq Turkiy kengash) birinchi sammiti 2022-yilda Toshkent shahrida bo‘lib o‘tadi. Sammitda tashkilotni institutsionalizatsiya qilish, ishtirokchi davlatlar o‘rtasidagi hamkorlikni chuqurlashtirish va savdo-iqtisodiy aloqalarni mustahkamlash bo‘yicha qator qarorlar qabul qilinishi kutilmoqda.
O‘zbekiston, Turkiya, Ozarbayjon, Qozog‘iston va Qirg‘iziston Turkiy davlatlar tashkilotiga a’zo hisoblanadi. Vengriya va Turkmaniston esa tuzilmada kuzatuvchi maqomiga ega.
Shanxay hamkorlik tashkilotiJoriy yilda O‘zbekiston ShHTga a’zo davlatlar rahbarlarining sammitiga mezbonlik qiladi. Tadbir yoz oylarida tar Samarqand shahrida bo‘lib o‘tadi. Sammit Eron 2021-yil sentabrida tashkilotga to‘laqonli ishtirokchi sifatida qo‘shilganidan beri birinchisi bo‘ladi.
ShHTga a’zo davlatlar: O‘zbekiston, Xitoy, Rossiya, Qozog‘iston, Qirg‘iziston, Tojikiston, Pokiston, Hindiston va Eron. Afg‘oniston, Mo‘g‘uliston va Belarus tashkilotda kuzatuvchi, Turkiya esa muloqot bo‘yicha hamkor sifatida ishtirok etadi.
Sammitda tashkilotga a’zo ko‘plab davlatlar bilan umumiy chegaraga ega Afg‘onistondagi vaziyat har tomonlama muhokama qilinadi va muhim qarorlar qabul qilinishi kutilmoqda.
Mustaqil Davlatlar Hamdo‘stligi
2022-yilda O‘zbekistonda, shuningdek, MDHga a’zo davlatlarning birinchi mintaqalararo forumi bo‘lib o‘tadi. Forumda a’zo davlatlarning turli mintaqa va viloyatlari o‘rtasida savdo-iqtisodiy va boshqa sohalardagi hamkorlikni rivojlantirishga doir masalalarni muhokama qilish rejalashtirilgan.
O‘zbekistonlik jurnalist Abduvali Saybnazarovning “Anadolu” nashriga aytishicha, 2022-yilda mamlakatda bo‘lib o‘tadigan uchrashuvlar O‘zbekiston dunyoga ochilgani va xalqaro maydonda faolroq rol o‘ynay boshlaganining ko‘rsatkichi hisoblanadi.
“Joriy yilda O‘zbekistonda ShHT, Turkiy davlatlar tashkiloti kabi tuzilmalarning sammitlari o‘tkazilishi Markaziy Osiyo davlatining xalqaro maydondagi nufuzini oshiradi”, — deya qo‘shimcha qilgan jurnalist.
Eslatib o‘tamiz, ShHTga 2021—2022-yillarda raislik qilish rasman O‘zbekistonga o‘tgan.
Bundan tashqari, Iqtisodiy hamkorlik tashkilotiga raislik qilish ham O‘zbekistonga o‘tgan. Mamlakat IHTning 2022-yildagi sammitiga mezbonlik qiladi.
Izoh (0)