Qashqadaryo viloyati hokimi Murotjon Azimovning og‘zaki topshirig‘iga binoan viloyat chegaralaridagi yo‘l-patrul xizmati postlaridan chigitni Samarqand viloyatiga olib o‘tish taqiqlangan. Bu haqda Kattaqo‘rg‘on shahri hokimi, senator Gavhar Alimova ma’lum qildi.
2-yanvar kuni Gavhar Alimovaning “Qashqadaryoning yozilmagan qonuni bormi?” sarlavhasi ostidagi murojaati e’lon qilindi. Unda hokim “Qashqadaryo viloyatiga mamlakatning barcha viloyatlarida amal qilinayotgan qonun va qoidalarga nega amal qilinmayapti?” degan savolni o‘rtaga tashlagan.
Uning so‘zlariga ko‘ra, Kattaqo‘rg‘onda qariyb 100 ta ish o‘rni yaratgan Marokand gold oil extraksiya korxonasi muammoga duch kelgan. 28-dekabr kuni kompaniya rahbari Saydin Ro‘ziyev shahar hokimiyatiga kelib, tovar va xomashyo birjasidan ochiq savdolar asosida sotib olingan 100 tonna chigit mahsulotini Qashqadaryodan Samarqandga olib kela olmayotganini ma’lum qilgan.
Tadbirkor uning yuklarini ikki viloyat chegarasida YPX xodimlari “Qashqadaryo viloyat hokimining birinchi o‘rinbosari Nodir Erkayevning topshirig‘i asosida ushlab turishganini” aytgan.
“Men Nodir Xudoyberdiyevichning raqamini topib, telefon qildim. Bir necha bor qilgan qo‘ng‘iroqlarimga javob bermagandan so‘ng, SMS orqali telefonimni ko‘tarishini iltimos qildim. Bir necha marta urinishlardan so‘ng va nihoyat Nodir Xudoyberdiyevich bilan telefon orqali bog‘lanib, chigit ortilgan yuk mashinalarini chegaradan o‘tkazishga yordam qilishini iltimos qildim. ‘…opajon, chigitni viloyat hokimi ruxsat bermasa, chegaradan chiqara olmayman’, dedi Nodir Xudoyberdiyevich”, — deya so‘zlab beradi Kattaqo‘rg‘on hokimi.
“Men umid bilan barcha tegishli hujjatlarni hokimning Telegram’iga tashlab berdim. Javob bo‘lmagandan so‘ng Telegram va qo‘l telefoniga SMS’lar yozdim, afsuski, hech qanday javob olishning iloji bo‘lmadi”, — deydi u.
Oradan 3 kun o‘tib, 2-yanvar kuni tadbirkorga chegaradan yuk ortilgan mashinalarini olib ketishini so‘rab Farhod va Jahongir deb o‘zini tanishtirgan YPX xodimlari telefon qilgan.
“Tadbirkor Saydin Ro‘ziyev bundan xursand bo‘lib, menga telefon qildi. Biroq xursandchiligimiz uzoqqa cho‘zilmadi. Tadbirkor menga telefon qilib YPX xodimlari viloyat hokimining birinchi o‘rinbosari Nodir Xudoyberdiyevich ruxsat bermayotgani vajidan yuk mashinalarini qo‘yib yubora olmasliklarini ma’lum qilgan. Shundan so‘ng, men yana janob Nodir Xudoyberdiyevichga qo‘ng‘iroq qilganimda, ‘…hozirgina viloyat hokimi bilan gaplashdim, chigitni qo‘yib yuborishga hech qanday ruxsat yo‘q. Opajon, ming afsus, men yuk mashinalarini qo‘yib yubora olmayman’, dedi”, — deya so‘zlab beradi hokim.
“Men 100 tonna chigitni olib o‘tish uchun 4 kun sarson bo‘ldim. Achinarlisi, murojaatimga va yozgan SMS’larimga viloyat hokimi ‘ha’ yoki ‘yo‘q’ deb javob berishi shunchalik ham qiyin bo‘ldimi? Yangi yil bayrami tadbirkorga, haydovchilarga va menga ham, afsuski, tatimadi. Axir bitta shahar hokimi 100 tonna chigitni o‘tkazish uchun 4 kun bezovta bo‘lishini qanday izohlash mumkin? Men shaxsiy manfaatim uchun jon kuydirayotganim yo‘q-ku”, — deya ta’kidladi hokim.
Kattaqo‘rg‘on shahri hokimi Murotjon Azimovdan javob kutayotganini qo‘shimcha qilgan.
“Gazeta.uz”ning yozishicha, nashr Qashqadaryo viloyati hokimligi matbuot xizmatidan izoh olish maqsadida murojaat qilganida, ular “masala puxta va har tomonlama o‘rganilayotganini” ma’lum qilishgan.
Eslatib o‘tamiz, 2020-yilning noyabrida Qashqadaryo, Surxondaryo va Xorazm viloyatlari hokimlarining og‘zaki ko‘rsatmasiga binoan postlardagi yo‘l patrul xizmati tomonidan paxta chigitini bir viloyatdan boshqa viloyatga olib o‘tish taqiqlangandi. Monopoliyaga qarshi kurashish qo‘mitasining aralashuvidan so‘ng, taqiqlar olib tashlangan edi.
Ma’lumot uchun, 2021–2018-yilning fevralidan buyon Davlat bojxona qo‘mitasi raisi lavozimida ishlab kelayotgan Murotjon Azimov prezident farmoni bilan Qashqadaryo viloyati hokimi vazifasini bajaruvchi etib tayinlangan.
Izoh (0)