O‘zbekiston va Afg‘oniston 2022-yilda elektr energiyasi yetkazib berish bo‘yicha 100 million dollarlik shartnoma imzoladi. Bu haqda Anadolu axborot agentligi xabar qilmoqda.
Ma’lum qilinishicha, shartnoma qo‘shni mamlakat operatori Da Afghanistan Breshna Sherkat (DABS) bosh ijrochi direktori Hofiz Muhammad Amin va “O‘zbekiston Milliy elektr tarmoqlari” rahbari Dadajon Isoqulov o‘rtasida imzolangan. Muzokaralar ikki kun davom etgan.
Shartnoma qiymati 2 milliard kVt/soatni tashkil etadi va qiymati yiliga 100 million dollarga yaqin bo‘ladi.
Muloqot davomida DABS delegatsiyasi o‘tgan yili imzolangan Surxon—Puli—Xumri elektr uzatish liniyasini qurish loyihasini ham muhokama qilgan. Afg‘oniston tomoni O‘zbekiston bilan to‘xtatilgan loyihalar bo‘yicha hamkorlik qilishga va’da berib, loyihalar xavfsizligini ta’minlashga tayyorligini bildirgan.
Qayd etilishicha, Markaziy Osiyoning yagona energetika tizimi Afg‘onistonga faqat O‘zbekiston orqali ulangan. Yagona energiya tizimi mamlakatlarida ishlab chiqarilgan elektr energiyasi faqat O‘zbekistondan eksport qilinishi mumkin.
Iqtisodchi-bloger Otabek Bakirovning yozishicha, O‘zbekiston Afg‘onistonga sotadigan elektrning qiymati 1 kVt/soat uchun 5 sentga teng bo‘ladi. “Afg‘oniston Toliblar tomonidan egallanganidan keyin to‘lovlarni to‘xtatganiga qaramay, O‘zbekiston elektr yetkazishda davom etayotgan yagona mamlakat bo‘lib qolmoqda”, — deydi u.
Oktabr oyida Afg‘oniston energetika kompaniyasining O‘zbekiston, Tojikiston, Turkmaniston va Eronga elektr energiyasi uchun 51 million dollardan ortiq qarzi borligi xabar qilingan edi. Biroq O‘zbekiston bosh vaziri o‘rinbosari Sardor Umurzoqovning so‘zlariga ko‘ra, Afg‘oniston muvaqqat hukumati elektr energiyasi bo‘yicha qarzini to‘liq qoplash majburiyatini olgan va O‘zbekiston “bir soat ham” Kobulga elektr energiyasi yetkazib berishni to‘xtatmagan.
Izoh (0)