Мисрда ноқулай об-ҳаво шароити сабаб уч киши вафот этди. Бу ҳақда Миср соғлиқни сақлаш вазирлиги расмий вакили Хусам Абдул Ғаффорга таяниб «ТАСС» хабар қилган.
Жумладан, Кафр-аш-Шайх вилоятида хўл симларни ушлаб олган эркак кучли электр токи уриши оқибатида ҳалок бўлган. Яна бир одам сирпанчиқ йўлда содир бўлган йўл-транспорт ҳодисаси оқибатида вафот этган.
Бундан ташқари Искандарияда кучли ёмғирдан кейин икки қаватли уй қулаб тушган ва вайроналар остидан бир кишининг жасади кавлаб олинган.
Об-ҳаво инжиқликлари туфайли мамлакатдаги олти вилоятда фавқулодда ҳолат тартиби жорий этилиб, мактаблардаги дарслар ҳам бекор қилинган. Қайд этилишича, кучли ёмғирлар ва туман атмосфера фронтини юзага келтирган.
Қизил денгиз соҳилларидаги Ҳургада курортида дўл ёғиб, яшил майсалар ва палмалар қор билан қопланган. Ижтимоий тармоқларда фавқулодда вазиятдан кейин мазкур манзара акс этган видеолар тарқалган.
Ёмғирлар мамлакатдаги бошқа бир курорт ҳудуд Синай яриморолини ҳам синовдан ўтказмоқда. Синайнинг тоғолди ҳудудларида қор ёғиши кутилмоқда. Қоҳира аҳолиси ҳам 2022 йилни кучли куз ёмғирлари билан қаршилади, Миср пойтахтида аввал ҳам январь бошида бундай об-ҳаво бўлганини кўпчилик эслай олмаяпти. Мисрдаги бундай ноқулай об-ҳаво ҳафта охиригача давом этиши тахмин қилинмоқда.
Аввал 2021 йил ноябрь ойида Мисрда ёмғирдан кейин кўчаларни чаён босган, уларнинг ҳужумидан 3 киши ҳалок бўлган ва 500 га яқин одам жабрланганди.
Изоҳ (0)