Xitoy 2021-yilda kosmik parvozlar soni bo‘yicha AQShni ortda qoldirdi

Xitoy 2021-yilda kosmik parvozlar soni bo‘yicha jahon rekordini o‘rnatdi, deb yozadi  Space News.

Qayd etilishicha, 2021-yilda Xitoy koinotga 55 ta raketa uchirgan, bu rekord ko‘rsatkich va 2020-yilga nisbatan 40 foizga ko‘p.

Xitoy aerokosmik fan va texnologiya korporatsiyasi mamlakat ushbu ko‘rsatkich bo‘yicha AQShni ortda qoldirib, dunyoda birinchi o‘rinni egallaganini ma’lum qildi. Bayonotda aytilishicha, ushbu 55 ta uchirishdan 48 tasi korporatsiya tomonidan amalga oshirilgan va ularning barchasi muvaffaqiyatli deb topilgan.

Xitoy oktabr oyi oxirida 40-marta raketa uchirish bilan bir yil ichidagi kosmik parvozlar soni bo‘yicha o‘zining rekordini yangilagandi. Avvalgi rekord 39 ta bo‘lib, 2018-yilda qayd etilgan, 2020-yilda ham mazkur ko‘rsatkich takrorlangan.

30-dekabr kuni Pekin vaqti bilan soat 00:43 da Xitoy joriy yildagi so‘nggi kosmik parvozini amalga oshirdi, mamlakat janubi-g‘arbidagi Sichuan provinsiyasidagi Sichan kosmodromidan “Shiyan-9” eksperimental aloqa sun’iy yo‘ldoshi “Chanjchen-3V” raketasi yordamida orbitaga muvaffaqiyatli olib chiqildi.

Eslatib o‘tamiz, Xitoyning “Chjujun” marsoxodi “Tyanven-1” kosmik apparati bilan 15-may kuni ertalab Marsga muvaffaqiyatli qo‘ngan edi. Bu Xitoyning boshqa bir sayyoraga qo‘ngan birinchi marsoxodi.

Avvalroq Xitoy Ilon Maskning SpaceX kompaniyasiga tegishli Starlink internet sun’iy yo‘ldoshlari ustidan Birlashgan Millatlar Tashkilotiga shikoyat qilgan edi. Xitoy hukumati Starlink sun’iy yo‘ldoshlari bilan to‘qnashuvning oldini olish uchun Xitoy kosmik stansiyasining trayektoriyasini o‘zgartirishga majbur bo‘lganini aytgan.