Putin va Bayden telefon orqali suhbatlashdi. Bu ularning 1 oy ichida ikkinchi muloqoti

Rossiya prezidenti Vladimir Putin va AQSh prezidenti Jo Bayden 30-dekabr kuni telefon orqali muloqot qildi. Bu haqda Kreml bayonotiga tayanib, Meduza xabar berdi.

Qayd etilishicha, suhbat 50 daqiqa davom etgan.

Rossiya prezidenti yordamchisi Yuriy Ushakovning aytishicha, Putin va Bayden Moskvaning xavfsizlik kafolati bo‘yicha talablarini muhokama qilgan. Ikki davlat prezidentlari Rossiyaning AQSh (9—10-yanvar kunlari Jenevada), NATO (12-yanvardan Bryusselda boshlanadi) hamda Yevropa Xavfsizlik va hamkorlik tashkiloti (13-yanvardan Venada boshlanadi) bilan o‘tkaziladigan uchrashuvida bu boradagi muzokaralarni davom ettirishga kelishib olgan.

Suhbat chog‘ida Putin, agar Rossiya chegaralari yaqinida hujum qurollari joylashtiriladigan bo‘lsa, mamlakat AQSh tutgan yo‘lni qo‘llashini ta’kidladi. U, shuningdek, va’da qilingan aksilrossiya sanksiyalarining joriy etilishi Rossiya va G‘arb o‘rtasidagi munosabatlarning to‘liq uzilishiga olib kelishini aniq qilib aytdi. Putinning so‘zlariga ko‘ra, bu xatolik bo‘lardi, dedi Ushakov.

Bayden AQSh Ukrainada hujum qurollarini joylashtirishni rejalashtirmayotganini aytgan. Ikki davlat prezidentlari muloqotni Yangi yildan keyin ham davom ettirishga kelishib oldi, deya qo‘shimcha qildi Putinning yordamchisi.

Vladimir Putin va Jo Bayden o‘rtasidagi muloqot G‘arbning Rossiya o‘z qo‘shinlarini Ukraina chegarasida to‘playotgani va Ukrainaga hujumni rejalashtirayotgani haqidagi bayonotlari ortidan kuchaydi.

Avvalgi muzokaralardan so‘ng Rossiya AQSh va NATOga xavfsizlik kafolatlari bo‘yicha talablarini taqdim etgandi. Ular orasida Ukrainani NATOga qabul qilmaslik talabi ham bor.