Uzbekistan Airways Farg‘ona vodiysi shaharlaridan talab yuqori bo‘lgan yo‘nalishlar bo‘yicha parvozlar amalga oshirish uchun “Sharqiy” xab tashkil etadi. Bu haqda aviakompaniya axborot xizmati xabar qildi.
Loyihaga ko‘ra, aviakompaniya mintaqadan Rossiya va Farg‘ona vodiysi aholisi orasida mashhur bo‘lgan uzoq xorij shaharlariga yo‘nalish tarmog‘ini kengaytirish maqsadida Namangan va Farg‘ona shaharlarining xalqaro aeroportlaridan foydalanadi.
2022-yilning 31-yanvaridan boshlab Uzbekistan Airways Express havo kemalarida Full Economy (to‘liq iqtisodiy sinf) tamoyili asosida Namangandan Rossiyaning Moskva, Perm, Samara, Omsk, Orenburg, Irkutsk, Krasnodar va Yekaterinburg shaharlariga to‘g‘ridan to‘g‘ri muntazam aviaqatnovlarni amalga oshirish boshlanadi. Talab oshgani sayin, Namangandan yo‘nalish tarmog‘ini kengaytirish ham ko‘rib chiqiladi.
Hozirgi vaqtda Farg‘ona shahar xalqaro aeroportidan Moskva, Qozon va Istanbulga aviaqatnovlar amalga oshirilmoqda. Bu “Sharqiy” xab tashkil etilishining birinchi bosqichi bolib xizmat qildi. “Sharqiy” xabni rivojlantirishning ikkinchi bosqichi yakunlanib, Namangandan parvozlarni amalga oshirish boshlangandan so‘ng, Uzbekistan Airways uchinchi bosqichga — Farg‘ona shahridan parvozlar sonini ko‘paytirish, shuningdek Farg‘ona xalqaro aeroportidan yo‘nalish tarmog‘ini kengaytirishga o‘tadi. Shu bilan birga, Farg‘onadan parvozlar faqat klassik (biznes va iqtisodiy sinflar) aviaqatnovlar asosida tashkil etiladi.
Avvalroq Namangan va Sankt-Peterburg o‘rtasida muntazam aviaqatnovlarni amalga oshirish boshlangani, Namangan xalqaro aeroportidan Novosibirsk va Qozonga aviaparvozlar yo‘lga qo‘yilayotgani xabar qilingandi.
Izoh (0)