Uzbekistan Airways Фарғона водийси шаҳарларидан талаб юқори бўлган йўналишлар бўйича парвозлар амалга ошириш учун «Шарқий» хаб ташкил этади. Бу ҳақда авиакомпания ахборот хизмати хабар қилди.
Лойиҳага кўра, авиакомпания минтақадан Россия ва Фарғона водийси аҳолиси орасида машҳур бўлган узоқ хориж шаҳарларига йўналиш тармоғини кенгайтириш мақсадида Наманган ва Фарғона шаҳарларининг халқаро аэропортларидан фойдаланади.
2022 йилнинг 31 январидан бошлаб Uzbekistan Airways Express ҳаво кемаларида Full Economy (тўлиқ иқтисодий синф) тамойили асосида Намангандан Россиянинг Москва, Перм, Самара, Омск, Оренбург, Иркутск, Краснодар ва Екатеринбург шаҳарларига тўғридан-тўғри мунтазам авиақатновларни амалга ошириш бошланади. Талаб ошгани сайин, Намангандан йўналиш тармоғини кенгайтириш ҳам кўриб чиқилади.
Ҳозирги вақтда Фарғона шаҳар халқаро аэропортидан Москва, Қозон ва Истанбулга авиақатновлар амалга оширилмоқда. Бу «Шарқий» хаб ташкил этилишининг биринчи босқичи болиб хизмат қилди. «Шарқий» хабни ривожлантиришнинг иккинчи босқичи якунланиб, Намангандан парвозларни амалга ошириш бошлангандан сўнг, Uzbekistan Airways учинчи босқичга — Фарғона шаҳридан парвозлар сонини кўпайтириш, шунингдек Фарғона халқаро аэропортидан йўналиш тармоғини кенгайтиришга ўтади. Шу билан бирга, Фарғонадан парвозлар фақат классик (бизнес ва иқтисодий синфлар) авиақатновлар асосида ташкил этилади.
Аввалроқ Наманган ва Санкт-Петербург ўртасида мунтазам авиақатновларни амалга ошириш бошлангани, Наманган халқаро аэропортидан Новосибирск ва Қозонга авиапарвозлар йўлга қўйилаётгани хабар қилинганди.
Изоҳ (0)