Samarqand viloyati Kattaqo‘rg‘on suv ombori chiqish kanalida cho‘kayotgan odam qutqarib qolindi, deya xabar bermoqda Favqulodda vaziyatlar vazirligi matbuot xizmati.

Ma’lum qilinishicha, 7-iyun kuni Kattaqo‘rg‘on shahrida yashovchi fuqaro (1960-yilda tug‘ilgan) spirtli ichimlik iste’mol qilgan holda Kattaqo‘rg‘on suv omborining chiqish kanalida cho‘milish maqsadida suvga tushgan.

Xavfsizlik qoidalariga rioya qilmaganligi sababli u suvda cho‘ka boshlagan.

Shu vaqt kanal yaqinidan o‘tib ketayotgan fuqaro jabrlanuvchining holini ko‘rib, zudlik bilan Kattaqo‘rg‘on shahar favqulodda vaziyatlar bo‘limiga xabar qilgan.

Qutqaruvchilarning tezkor harakatlari sababli jabrlanuvchi o‘z vaqtida qutqarib olindi. Jabrlanuvchiga tuman tez yordam shifokorlari tomonidan zarur yordam ko‘rsatildi. Qayd etilishicha, uning salomatligiga ziyon yetmagan.

Eslatib o‘tamiz, O‘zbekistonda yoz mavsumigacha necha kishi cho‘kish bilan bog‘liq baxtsiz hodisaga uchragani ma’lum qilingandi.

Bundan avval Mo‘ynoqda ikki o‘smir kanalga cho‘kib ketgani, Katta Farg‘ona kanalining cho‘milish mumkin bo‘lmagan hududida 15 yoshli bola cho‘kib ketgani hamda Toshkentdagi Anhor kanalidan erkak jasadi topilgani to‘g‘risida xabar berilgandi.