AQSh Xalqaro taraqqiyot agentligi (USAID) Agrobiznesni rivojlantirish loyihasi mahalliy xususiy agrobiznes korxonalari o‘rtasida biznes g‘oyalarning uchinchi tanlovini e’lon qildi. Agentlikning O‘zbekistondagi vakolatxonasidan “Daryo”ga ma’lum qilishlaricha, ishtirok etish uchun loyiq deb topilgan korxonalar Agrobiznesni rivojlantirish jamg‘armasi orqali qishloq xo‘jalik mahsulotlarining qo‘shimcha qiymatini va savdo hajmini oshirish, yangi ish o‘rinlarini yaratish, yangi bozorlarga kirib borish kabi yo‘nalishlarda qo‘llab-quvvatlanadi.
Bu 2021-yilda Agrobiznesni rivojlantirish jamg‘armasi doirasidagi biznes g‘oyalar tanlovining uchinchisi bo‘lib, o‘tgan ikkita tanlov natijasida O‘zbekistonning barcha viloyatlaridan 200 dan ziyod ariza kelib tushdi. Olingan arizalar orasidan 11 xususiy agrobiznes korxonalari tanlab olingan bo‘lib, ularga bog‘dorchilik, chorvachilik, sutchilik va agroturizm sohalaridagi mahsulotlarning qo‘shimcha qiymatini oshirish uchun qiymati 100 milliondan 300 million so‘mgacha bo‘lgan yangi texnologiyalar taqdim etiladi.
Agrobiznesni rivojlantirish jamg‘armasi qishloq xo‘jaligi yo‘nalishida faoliyat yuritayotgan korxonalarda yangi texnologiyalarning joriy etilishini qo‘llab-quvvatlaydi va bu orqali ularning o‘sishiga ko‘maklashadi. Agrosanoat korxonalarini qo‘llab-quvvatlash O‘zbekistonga o‘z iqtisodiyotini diversifikatsiya qilish, mintaqaviy hamda xalqaro savdo hajmlarini oshirish imkonini beradi.
“USAID’ning Agrobiznesni rivojlantirish loyihasi, tegishli malaka va imkoniyatlarga ega bo‘lgan agrobiznes korxonalari, ayniqsa, ayollar va yoshlar rahbarligidagi hamda ayol va yoshlarni ish bilan ta’minlayotgan korxonalarning loyiha rejalarini kutib qoladi”, — deyiladi agentlik e’lonida.
Arizalar 2022-yil 14-yanvargacha qabul qilinadi. Tanlov konsepsiyasi va biznes g‘oyalar bo‘yicha takliflarni kiritish uchun ariza namunasini quyidagi havola orqali yuklab olish mumkin. Ushbu tashabbus USAID’ning O‘zbekiston Qishloq xo‘jaligi vazirligi bilan hamkorlikda amalga oshirilayotgan besh yillik Agrobiznesni rivojlantirish loyihasi tomonidan amalga oshirilmoqda.
Ma’lumot uchun, USAID O‘zbekiston hukumati bilan mamlakat iqtisodiyotini diversifikatsiyalash va mintaqaviy savdoni oshirish, salomatlik uchun jiddiy xavf-xatarlar, jumladan COVID-19’ni bartaraf etish, hukumatning aholi ehtiyojlariga oqilona yondashish salohiyatini oshirish yo‘lida hamkorlik qiladi.
Izoh (0)