So‘nggi kunlarda O‘zbekiston yo‘llarida sodir bo‘lgan yo‘l-transport hodisalari tafsilotlarini taqdim etamiz.
Jizzaxda Nexia-2 haydovchisi 11 yoshli piyodani urib yubordi.
Yo‘l-transport hodisasi 22-dekabr kuni 09:55 atrofida Sharof Rashidov tumani “Olmachi” mahallasi Ko‘chatzor ko‘chasida sodir bo‘lgan. Nexia-2 haydovchisi (2001-yilda tug‘ilgan) harakatlanish jarayonida yo‘lning belgilanmagan qismidan kesib o‘tayotgan 5-sinf o‘quvchisini (2010-yilda tug‘ilgan) urib yuborgan.
Oqibatda voyaga yetmagan piyoda tan jarohatlari olib, respublika shoshilinch tibbiy yordam ilmiy markazi Jizzax filiali jonlantirish bo‘limiga yotqizilgan.
Samarqandda qisqa tutashuv oqibatida MAN yuk mashinasi yonib ketdi.
Holat 26-dekabr kuni soat 04:00 atrofida Samarqand shahar hududidan o‘tuvchi M-39 avtomobil yo‘lining 1079-kilometrida sodir bo‘lgan. Toshkent—Samarqand yo‘nalishi bo‘ylab harakatlanib kelaytgan MAN yuk avtomobilining yukxonasidagi muzlatkichda qisqa tutashuv yuzaga kelgan. Oqibatda yong‘in kelib chiqib, transport vositasining kabina qismiga ham ta’sir qilgan.
Yong‘in o‘t o‘chiruvchilar tomonidan bartaraf etilgan. Tan jarohati olgan fuqarolar yo‘q. Holat yuzasidan shahar YHXB xodimlari tomonidan surishtiruv ishlari olib borilmoqda.
Qashqadaryoda MAN yuk avtomashinasining shinasida yong‘in chiqdi.
YTH Qashqadaryo viloyati Chiroqchi tumani hududidan o‘tuvchi xalqaro ahamiyatga ega A-380 avtomobil yo‘lining 45-kilometrida 26-dekabr kuni soat 08:55 atrofida ro‘y bergan. Harakatlanish jarayonida MAN yuk mashinasining orqa chap shinasida yong‘in kelib chiqqan. Oqibatda mashina saloni va kuzov qismlari to‘liq yonib ketgan.
Yong‘in o‘t o‘chiruvchilar tomonidan o‘chirilgan. Tan jarohati olganlar yo‘q. Holat yuzasidan mas’ul xodimlar tomonidan dastlabki surishtiruv ishlari olib borilmoqda.
Mavzuga doir:
Izoh (0)