“Hokim ertalab shifokor, kunduzi o‘qituvchi, kechasi tadbirkor, kerak bo‘lsa, farrosh bo‘lsin”. Zoir Mirzayev — hokimlar nimalarni bilishi kerakligi haqida

Toshkent viloyati hokimi Zoir Mirzayev Xalq deputatlari viloyat kengashi navbatdagi sessiyasida hokimlar qaysi sohalarni yaxshi bilishi, tushunishi kerakligini aytdi. Bu haqda Toshkent viloyati hokimligi xabar qildi.

Ma’lum qilinishicha, sessiyada Zoir Mirzayev jurnalistlarni qiziqtirgan savollarga atroflicha javob bergan. Xususan, viloyatning olis joylarida maktab o‘quvchilari uchun maxsus transport qatnovini yo‘lga qo‘yish, xorijda ishlayotgan fuqarolarning bandligini ta’minlash, yo‘l qurilishi, xizmat ko‘rsatish va sanoat tarmoqlari faoliyatini rivojlantirish masalalarida fikr-mulohazalar bildirgan.

“Bugungi kunda hokim ertalab shifokor, ‘obed’da o‘qituvchi, kechga tomon tadbirkor, kechasi, kerak bo‘lsa, farrosh yoki yo‘lchi bo‘lsin. Hamma sohani yaxshi bilishi, tushunishi muhimdir. Lekin har qaysi rahbar yoki soha egasi ‘Mening fikrim to‘g‘ri’, desa xato qiladi. Biz shunday fikrlashimiz kerakki, keng jamoatchilik qo‘llab-quvvatlasagina to‘g‘ri bo‘ladi. Men shuning tarafdoriman”, — degan Zoir Mirzayev.