Jahongir Ortiqxo‘jayev Qo‘yliq bozorini ko‘chirish zarurat ekanini aytgan Bektemir hokimini rag‘batlantirdi, o‘zini o‘zi mukofotlagan Sergeli hokimini esa jazoladi

Toshkent shahridagi 3 nafar tuman hokimiga qo‘shimcha ustama mablag‘ berilib, 3 nafar hokimga jarima tayinlandi. Shahar hokimi Jahongir Ortiqxo‘jayev tegishli qarorni qabul qildi.

Qayd etilishicha, shaharda hududlarning ijtimoiy-iqtisodiy rivojlantirishni reyting baholash natijalariga muvofiq “yaxshi” baholangan Mirobod tumani hokimi Shuxrat Pulatov, Bektemir tumani hokimi Tapil Mahamadziyayev va Yangihayot tumani hokimi Xayot Inagamov, ularning o‘rinbosarlari hamda sektor rahbarlari maoshiga 30 foiz ustamalar tegishli mahalliy budjetlarning qo‘shimcha manba mablag‘lari hisobidan belgilangan.

Eslatib o‘tamiz, 7-dekabr kuni Qo‘yliqda yo‘l infratuzilmasini yaxshilash, kommunikatsiya tarmoqlarini takomillashtirish va tirbandliklarning oldini olish maqsadida Toshkentdagi eng yirik bozorlardan biri “Qo‘yliq” boshqa manzilga ko‘chirilishi xabar qilingandi. 9-dekabr kuni esa “bozor buzilishidan norozi odamlar” katta avtoyo‘lni to‘sib qo‘ygan. Bektemir tuman hokimi Tapil Mahamadziyayev esa holatga munosabat bildirib, “O‘zim ham Qo‘yliqdan bozor qilaman, lekin uni ko‘chirmasak bo‘lmaydi”, — degandi.

Shuningdek, “qoniqarsiz” baholangan Shayxontohur tumani hokimi Abduqahhor To‘xtayev, Uchtepa tumani hokimi Farhod Abdullayev va Sergeli tumani hokimi Elbek Shukurov, ularning o‘rinbosarlari hamda sektor rahbarlariga nisbatan oylik ish haqidan 30 foiz jarima jazosi qo‘llanilgan.

Sergeli tumani hokimi Elbek Shukurov “mehnatda tashabbuskorligini rag‘batlantirish” maqsadida o‘ziga 35 million so‘m miqdorda ustama haqi belgilash to‘g‘risida qaror qabul qilgandi. Uning Alter Ego loyihasiga bergan intervyusida aytishicha, tuman hokimlarining oyligi 5-6 million so‘m atrofida.