“Menga ‘hurmatli’ deya murojaat qilmanglar”. Zoir Mirzayev ilk “hokimlik soati”ni o‘tkazdi

22-noyabr kuni Toshkent viloyati hokimi vazifasini bajaruvchi Zoir Mirzayev raisligida videoselektor tarzida ilk hokimlik soati o‘tkazildi. Bu haqda viloyat hokimligi axborot xizmati xabar berdi.

Ma’lum qilinishicha, hokimlik soatida viloyatning 22 ta tuman-shaharlari sektor rahbarlari, viloyatdagi barcha boshqarma va tashkilotlar va ularning hududiy bo‘linmalari boshliqlari, mahalliy kengashlar deputatlari, viloyat faollari ishtirok etgan. Yig‘ilish avvalida viloyat rahbari Zoir Mirzayev boshqaruv siyosatida belgilab olingan eng ustuvor vazifalarga alohida to‘xtalib o‘tgan.

Hokimlik soatidagi asosiy iqtiboslar:

• “Fuqarolar bilan qabulni ko‘chma tartibda olib boramiz. Unda hamma sektor rahbarlari qatnashadi. Soat 14:00 da bo‘ladigan qabulga soat 08:00 da o‘sha murojaatchining sektor rahbari, tegishli tashkilot mutasaddisi uyiga borib, masalasini joyida o‘rganib chiqadi”;
• “Qanday toifadagi rahbar bo‘lishidan qat’iy nazar, bilib olsin, faoliyatimizning asosiy mezoni ‘Inson qadri uchun’ tamoyili asosida bo‘ladi. Buni kerak bo‘lsa, stolning ustiga yozib qo‘ying. Yana shuni ham yozib qo‘yinglarki, ishimizda ‘mayda-chuyda masalaning o‘zi yo‘q’”;
• “Haftada bir marta, dushanba kuni bajarilgan ishlar tahlili, muhokamasi bo‘yicha yig‘ilish o‘tkaziladi”;
• “Fuqarolarning murojaatlarini qabul qiladigan Telegram-bot tashkil qilamiz. Kerak bo‘lsa, o‘sha fuqaro bilan telefonda o‘zim gaplashaman”;
• “Hokimiyatdan har bir chiqayotgan qog‘oz — hokimiyatning yuzi. Davlat tili bo‘yicha hokimiyat hujjatlarini xato yozadigan xodim hokimiyatda ishlashi mumkin emas”;
• “Oshkoralik, shaffoflik ko‘pchilikka yoqmaydi, lekin har qanday chiqqan negativga sektor rahbari munosabat berishi shart. Ijtimoiy tarmoqqa kirishni bilmasangiz, o‘rganing, rahbar zamondan orqada qolishi mumkinmas”;
• “Oldindan kelishib olaylik, menga ‘hurmatli’ deya murojaat qilmanglar”;
• “Nimaga ayrim hokimlar bloger, jurnalistlar uchun yopiq?! Press-tur o‘tkazib, jurnalistlar yonida yurib, bajarilayotgan ishlarni ko‘rsatinglar. Yomonini ham ko‘rsataylik, yomoni ham o‘zimizniki”;
• “Daraxt ekaveramiz, lekin uning ko‘karib chiqishi-chi?”;
• “Viloyatimiz tuman-shaharlaridagi tahririyatlarni qo‘llab-quvvatlashga tayyorman. Gazetalar bizga kerak. Hududiy tahririyatlardagi jurnalistlar tajribasini qadrlanglar, qo‘llab-quvvatlanglar. Bu bo‘yicha mutasaddilardan aniq takliflar kutamiz”.

Eslatib o‘tamiz, 18-noyabr kuni Toshkent viloyati hokimi Davron Hidoyatov lavozimidan ozod etilib, Chirchiq shahri hokimi etib tayinlandi. Hidoyatovning o‘rniga Qashqadaryo viloyatiga 2019-yilning oktabridan buyon rahbarlik qilib kelayotgan Zoir Mirzayev tayinlangan. Unga qadar  bosh vazir o‘rinbosari hamda qishloq va suv xo‘jaligi vaziri lavozimlarida faoliyat yuritgan. 2018-yil oktabrida “Oqqo‘rg‘on voqeasi” sabab ishdan olinib, Sharof Rashidov tumaniga hokim etib tayinlangandi.