Бельгия ҳукумати 2025 йилга қадар мамлакатдаги барча атом электростанциялари ёпилишини маълум қилди. Бу ҳақда Reuters агентлигига таяниб, Tengrinews хабар берди.
Айни вақтда Бельгияда иккита АЭС мавжуд — Доэль ва Тиханжда жойлашган бўлиб, уларнинг еттита атом реактори бор. Бельгиядаги ядровий муаммони қандай ҳал қилиш бўйича мунозаралар ҳукумат томонларининг кескин келишмовчилиги билан узоқ йиллар давом этган ва 2021 йилда ушбу масалани ҳал этишнинг сўнгги муддати белгиланган.
Музокаралардан сўнг вазирлар муросага келган ва унга кўра мамлакатдаги мавжуд сўнгги атом электростанция 2025 йилда ёпилиши керак. Ёпилиш ишлари 2022 йилда хавфсиз фойдаланишдан чиқариш йўли орқали бошланади ва 2045 йилда иккала завод ҳам бузиб ташланади. Бельгиядаги еттита реакторга эга иккита атом станцияси Франциянинг Engie компанияси томонидан бошқарилади ва мамлакатда ишлаб чиқариладиган электр энергиясининг қарийб ярми уларнинг ҳисобига тўғри келади.
Келишувда ҳукумат энергия танқислигини тўлдириш учун иккита газ электростанция қурилишига умид билдирган. Ҳукуматнинг маълум қилишича, режа март ойида мавжуд муаммоларни ҳал этиш мақсадида қайта кўриб чиқилади. Бош вазир Александр Де Кроонинг айтишича, ушбу объектларда қурилган янги реакторлар хавфсизлик тизимлари сифатида кенгайтирилиши мумкин, аммо бунинг «эҳтимоли жуда камлигини» қўшимча қилган.
Мамлакат ядровий технологиялардан бутунлай воз кечмайди, битим доирасида 100 миллион евро тадқиқотларга, жумладан, кичик модулли атом электростанциялари учун йўналтирилади.
Аввалроқ Хитойнинг «Тайшан» АЭСда радиация даражаси ошгани, Лукашенко Беларусда иккинчи АЭС қуришга рухсат бергани, Франция, Польша ва яна беш мамлакат атом энергетикасини ёқлаб чиққани тўғрисида хабар берилганди.
Изоҳ (0)