Putin: “Zelenskiy Ukraina xalqining tinchlik haqidagi so‘roviga javob bermayapti, u ‘radikal unsurlar’ ta’siriga tushib qolgan”

Ukraina prezidenti Vladimir Zelenskiy xalqining tinchlik haqidagi so‘roviga javob bermayapti, u “radikal unsurlar” ta’siriga tushib qolgan. Bu haqda Rossiya prezidenti Vladimir Putin 23-dekabr kuni o‘tkazgan yillik matbuot anjumanida Rossiya—Ukraina ziddiyatlari haqidagi savolga javob berish mobaynida aytib o‘tdi.

Putin Ukraina rahbariyatini Donbassdagi mojaroni tinch yo‘l bilan hal qilish uchun qabul qilingan Minsk kelishuvlarini bajarishdan hamda o‘zini respublika deb e’lon qilgan DXR va LXR (Donetsk va Lugansk Xalq Respublikalari) yetakchilari bilan muzokara qilishdan bosh tortishda aybladi.

“Endi ular bilan gaplashishdan bosh tortishmoqda, ularni terrorchi deb e’lon qilishmoqda. Buning sababini tushuntirolasizmi? Chunki prezident Zelenskiy xalqning tinchlik haqidagi so‘roviga javob berish o‘rniga hokimiyat tepasiga kelib, avvalgi rahbarlar kabi radikal unsurlar ta’siriga tushib qoldi. Ularni Ukrainada ‘natsiklar’ (ekstremistik millatchi guruh a’zolari) deyishadi”, — ta’kidladi Putin.

U, shuningdek, Rossiya Ukrainaga hujum qilishni rejalashtirayotgani haqidagi xabarlarga izoh berdi: “Bizning harakatlarimiz o‘z xavfsizligimizni ta’minlash zaruratiga bog‘liq bo‘ladi. NATOning Sharqqa tomon yanada kengayishi nomaqbul ekanini aniq qilib aytganmiz”.

Putinning qo‘shimcha qilishicha, G‘arb davlatlari 1990-yillarda NATOni Sharqqa tomon kengaytirmaslik haqida va’da berishda Rossiyani “aldagan”. “Aldashdi. NATOni beshta to‘lqinda kengayishi — ochiqdan ochiq g‘irromlik”, — dedi u.

Rossiya qo‘shinlarining Ukraina bilan chegarada to‘planayotgani haqida ma’lumotlar 2021-yilning kuzida paydo bo‘lishni boshladi. G‘arb OAV manbalariga ko‘ra, Ukrainaga hujumda 100-175 ming rossiyalik askar ishtirok etishi mumkin. Kreml bu xabarlarni “quruq, asossiz holda keskinlikni kuchaytirish” deb atadi. AQSh rasmiylarining fikricha, Rossiya prezidenti Vladimir Putin Ukrainaga bostirib kirish to‘g‘risida hali qaror qabul qilmagan.

Bu orada Yevropada xavfsizlik kafolatlari bo‘yicha muzokaralar boshlandi. Rossiya Tashqi ishlar vazirligi AQSh va NATO bilan kelishuv loyihalarini e’lon qildi. Rossiya tomoni boshqa narsalar qatori NATOga Ukrainani alyansga qo‘shilishdan chetlashtirishni, shuningdek, Sharqiy Yevropa va Markaziy Osiyoda har qanday harbiy faoliyatdan voz kechishni taklif qildi. AQSh Rossiyaning takliflarini ko‘rib chiqqanini, ammo Yevropa davlatlarining ishtirokisiz ularni muhokama qilmoqchi emasligini ma’lum qildi.