Isroil hukumati koronavirusning tez tarqalayotgan yangi “omikron” shtammiga qarshi kurashish uchun 60 yoshdan oshgan fuqarolarning barchasiga vaksinaning to‘rtinchi dozasini olishni tavsiya qildi. Bu haqda mamlakat Sog‘liqni saqlash vazirligiga tayanib, “Kommersant” xabar berdi.
Qayd etilishicha, vaksinaning to‘rtinchi dozasini uchinchi dozadan to‘rt oy o‘tgach qabul qilish mumkin. Isroilda ikkinchi va uchinchi dozalarni olish oralig‘i besh oydan uch oygacha qisqartirilgan.
Isroil bosh vaziri Naftali Bennett fuqarolarni imkon qadar tezroq emlanishga chaqirdi. U Isroil dunyoda birinchi bo‘lib fuqarolariga vaksinaning uchinchi dozasini bera boshlaganini ta’kidlab o‘tdi.
“Bu juda yaxshi yangilik, vaqtni behuda sarflamang va borib emlaning”, — dedi Bennet The Jerusalem Post bilan suhbatda. Isroil bosh vazirining fikricha, vaksinaning to‘rtinchi dozasi “dunyoni qamrab olgan ‘omikron’ to‘lqinini yengishga” yordam beradi.
Isroilda 60 yoshdan oshgan insonlar uchun buster inyeksiyalar 2021-yilning iyul oyi oxiridan berila boshlagandi. Keyinroq 16 yoshdan oshgan fuqarolarga vaksinaning ikkinchi dozasini olgandan besh oy o‘tib, uchinchi doza bilan emlanishga ruxsat berildi.
O‘tgan bir sutkada Isroilda “omikron” shtammi bilan kasallanish bo‘yicha 150 dan ortiq yangi holati qayd etildi. Sog‘liqni saqlash vazirligi ma’lumotlariga ko‘ra, 20-dekabr, yakshanba kuni mamlakatda ikki oy ichida birinchi marta koronavirus bilan kasallanganlarning kunlik soni 1000 kishidan oshgan.
Eslatib o‘tamiz, Isroil “omikron” shtammining tarqalishining oldini olish maqsadida dunyoda birinch bo‘lib chet el fuqarolari uchun 2 haftaga o‘z chegaralarini yopib qo‘ygandi.
Izoh (0)