Ilon Mask Tesla kompaniyasidagi ulushining 10 foizini sotish haqidagi va’dasini bajarish uchun yetarlicha aksiyalarni sotdi. Bu haqda milliarder The Babylon Bee satirik nashriga bergan intervyusida ma’lum qildi.
“10 foiz atrofidagi mo‘ljalga yetish uchun yetarli miqdorda aksiyalarni sotdim va bunda imkon qadar aniqlikka harakat qildim”, — dedi Tesla rahbari.
MarketWatch’ning AQSh Qimmatli qog‘ozlar va birjalar komissiyasi hujjatlariga tayanib ma’lum qilishicha, 21-dekabr kuni Mask ikki millionta aksiyani sotib olish opsionlarini realizatsiya qilgan va Tesla’ning 584 mingga yaqin qimmatli qog‘ozlarini sotgan.
Natijada tadbirkor tomonidan sotilgan aksiyalarning umumiy soni 13,5 million donaga yetdi. Reuters hisob-kitoblariga ko‘ra, bu Mask sotmoqchi bo‘lgan miqdorning 80 foizini tashkil qiladi. Noyabr oyi boshida, Mask Twitter’dagi obunachilari orasida so‘rovnoma o‘tkazgan paytda, unga tegishli ulushning 10 foizi taxminan 17 millionta aksiyaga to‘g‘ri kelardi.
Shu bilan birga, Mask har biri uchun 6,24 dollardan 16,4 million dona aksiyani sotib olish opsionlarini realizatsiya qildi, bu esa aslida uning kompaniyadagi ulushini oshirdi, deb yozadi MarketWatch.
8-noyabr kuni Mask Twitter’dagi obunachilari orasida so‘rovnoma o‘tkazgan. Unda biznesmen obunachilardan Tesla aksiyalarining 10 foizini sotish kerakmi yoki yo‘qligini so‘ragan va har qanday holatda ovoz berish natijalariga rioya qilishga va’da bergan. Uning aytishicha, aksiyalarni sotish soliq to‘lashning yagona yo‘li, chunki u ish haqi yoki bonuslar olmaydi. Respondentlarning deyarli 58 foizi aksiyalarni sotish uchun ovoz bergan, unda 3,5 milliondan ortiq kishi ishtirok etgan.
Reuters ma’lumotlariga ko‘ra, so‘rovdan oldin Mask Tesla’ning umumiy qiymati 200 milliard dollardan ortiq bo‘lgan 170,5 millionga yaqin aksiyasiga egalik qilgan, 10 foiz ulushi esa 21 milliard dollarga baholangan.
Umuman olganda, so‘rovnomadan so‘ng tadbirkor Tesla aksiyalarini sotishdan 14 milliard dollardan ko‘proq daromad oldi. Shu bilan birga u ushbu pullarning katta qismini — 11 milliard dollardan ko‘prog‘ini 2021-yilgi soliqlarni to‘lashga sarflamoqchi.
Izoh (0)