Россиялик журналист Дмитрий Муратов ўзига берилган Нобель мукофоти маблағларини хайрия ташкилотларига ўтказиб берди

Россиянинг «Новая газета» нашри бош муҳаррири Дмитрий Муратов ваъда қилганидек, ўзига берилган тинчлик бўйича Нобель мукофоти маблағларини хайрияга топширди, деб хабар беради Meduza.

«Мукофотни олиш уни сарфлашдан кўра тезроқ бўлди. Аммо биз буни ‘ВТБ’ банки аниқ ишлаган менежменти сабаб амалга оширдик, шу сабабли унинг ходимларига миннатдорчилик билдираман», — дейди Муратов.

Мукофотнинг умумий суммаси қарийб 40,2 миллион рублни (546 минг доллар) ташкил этган. Пул ташкилотлар ўртасида тақсимланган бўлиб, улар «шериклар» – «Новая газета»ни хайрия билан қўллаб-қувватлаган ўқувчилар орасидан овоз бериш йўли билан танланган.

Натижада беш миллион рублдан «Маёқли уй» хосписи (паллиатив ёрдам кўрсатилувчи махсус касалхона), «Ҳаёт совға қил», «Меҳр доираси» ва «Умид» жамғармалари ҳисобига ўтказилган. Шунингдек, яна 10 миллион рубль турли нашр ходимларининг оғир касалликларига қарши курашишда ёрдам берадиган ОАВ ходимларининг тиббиёт жамғармасига ўтказилган.

Бундан ташқари, маблағларнинг бир қисми Россияда матбуотнинг аҳволини тасвирловчи фильмни яратишга ва «Новая газета»нинг айрим ходимларини рағбатлантиришга йўналтирилган. «Озгинаси жамғарма сифатида қолди (‘Новая газета’ учун) — ҳар эҳтимолга қарши», — дея қўшимча қилган Муратов.

Эслатиб ўтамиз, 8 октябрь куни тинчлик бўйича Нобель мукофотига Россиянинг «Новая газета» нашри бош муҳаррири Дмитрий Муратов ва филиппинлик журналист, Rapple мухолифатчи сайти раҳбари Мария Ресса сазовор бўлди. Нобель мукофоти уларга «демократия ҳамда барқарор тинчлик ўрнатилишининг дастлабки шарти бўлган фикр билдириш эркинлигини ҳимоя қилиш бўйича интилишлари» учун берилган.