Checheniston rahbari Ramzan Qodirov Turkiyada Joxar Dudayev nomidagi bog‘ning ochilishi yuzasidan bildirgan munosabatida hissiyotga erk bergan, ammo uni tushunish kerak, deya o‘z fikrini aytib o‘tgan Rossiya prezidenti matbuot kotibi Dmitriy Peskov.
“Rossiyaning ushbu hududi(Checheniston)ni o‘z nazoratiga olishga uringan terrorchilar tomonidan boshlangan bir necha urushlarda omon qolgan hudud rahbarining ushbu munosabati juda-juda hissiy, ammo tushunarli”, — dedi Peskov.
10-dekabr kuni Turkiya shimoli-g‘arbidagi Kyorfez shahrida chechen ayirmachilari yetakchisi Joxar Dudayev sharafiga bog‘ ochilgandi. 1991-yilda Dudayev Checheniston Ichkeriya Respublikasini e’lon qilgan (“Ichkeriya va Dog‘iston xalqlari kongressi” Rossiya qonunchiligiga muvofiq terrorchi deb tan olingan tashkilotlarning yagona federal ro‘yxatiga kiritilgan). 1996-yilda Rossiya maxsus xizmatlari Dudayevni yo‘q qilgan.
Turkiyadagi bog‘ning ochilish marosimida mahalliy hokimlik Dudayevni “ozodlik uchun kurash” ramzi deb atagan. Qodirov Turkiya terrorchilarni bekitayotganini aytdi va mamlakat prezidenti Rajab Toyyib Erdo‘g‘onni “bir qarorga kelishga” chaqirdi: “Yoki terrorchilarni omma oldida qo‘llab-quvvatlaydigan davlat maqomini oling yoki Rossiya Federatsiyasining orqa tomonida o‘z e’tiqodlaringizni o‘zgartiravermasdan, u bilan shaffof va halol munosabatlar tarafdori bo‘ling”, — deb yozgan u Telegram kanalida.
Qodirov Turkiyaning harakatlarini Rossiya—Turkiya munosabatlariga tahdid deb atadi. Uning so‘zlariga ko‘ra, “qidiruvdagi banditlar va bezorilar” Turkiyada boshpana topib, bog‘lar nomini terrorchilar nomiga o‘zgartirish bo‘yicha namoyishkorona yig‘ilishlar va tadbirlarni tashkil etar ekan, Checheniston javob choralarini ko‘rish huquqini o‘zida saqlab qoladi.
Qodirovning aytishicha, Turkiyada terrorchi tashkilot deb hisoblangan “Kurdiston ishchilar partiyasi” asoschisi Abdulla O‘jalanning nomini Grozniyda abadiylashtirish Anqaraning harakatlariga javob bo‘lishi mumkin.
Avvalroq Rossiya Tashqi ishlar vazirligining rasmiy vakili Mariya Zaxarova Turkiyada Johar Dudayev nomidagi bog‘ning ochilishini qoralagandi. Uning so‘zlariga ko‘ra, Rossiya “ekstremistlar, terrorchilar, jangarilar va kollaboratsionistlarga har qanday yodgorlik o‘rnatish bo‘yicha prinsipial pozitsiyaga” amal qiladi.
Izoh (0)