Namangan viloyati Qoraqalpog‘iston Respublikasining Qorao‘zak tumani bilan yaqin hamkorlikni yo‘lga qo‘ydi. Bu haqda viloyat hokimi Shavkat Abdurazzaqov xalq deputatlari viloyat kengashi sessiyasidagi murojaatidan keyingi matbuot anjumanida ma’lum qildi, deya xabar beradi “Daryo” muxbiri Azizbek Abduvaliyev.
“O‘zim kuni-kecha o‘rinbosarlarim va 30 nafardan ortiq eng peshqadam tadbirkorlarni olib, Qoraqalpog‘istonga borib keldim. Qorao‘zak tumanida o‘nlab loyihalarni amalga oshirishni rejalashtirganmiz. Bu ishlarni muvofiqlashtirish uchun u yerda viloyat vakolatxonasini ham ochdik. Bilasiz, Namanganda yer tanqis. Dehqonchilik yoki chorvachilikni rivojlantirish uchun bo‘sh maydonlarni topish katta muammo. Qorao‘zakda esa bepoyon o‘zlashmagan yerlar mavjud, bu hudud bizning eng katta tumanimiz bo‘lgan Popdan ham deyarli ikki baravar katta”, — dedi viloyat hokimi.
Abdurazaqqovga ko‘ra, namanganlik fermer va tadbirkorlar tomonidan Qorao‘zakda hozirgacha 1300 gektar yer o‘zlashtirilgan. Kelgusida bu ko‘rsatkich 10 ming gektarga yetkaziladi. O‘zlashtirilgan yerlarda uzum, bodom, qizilmiya, sabzavot va poliz ekinlari yetishtirish, chorvachilikni rivojlantirish ko‘zda tutilgan. Shuningdek, mahalliy aholi bandligini ta’minlash uchun qishloq xo‘jaligi klasterlari va tikuv-trikotaj korxonalari tashkil etiladi.
Namanganlik tadbirkorlar tomonidan Qoraqalpog‘istonda bugungi kungacha jami 17 ta istiqbolli loyiha ishlab chiqilgan. Ularning umumiy qiymati 222 milliard so‘mdan ortiq.
Izoh (0)