Наманган вилояти Қорақалпоғистон Республикасининг Қораўзак тумани билан яқин ҳамкорликни йўлга қўйди. Бу ҳақда вилоят ҳокими Шавкат Абдураззақов халқ депутатлари вилоят кенгаши сессиясидаги мурожаатидан кейинги матбуот анжуманида маълум қилди, дея хабар беради «Дарё» мухбири Азизбек Абдувалиев.
«Ўзим куни-кеча ўринбосарларим ва 30 нафардан ортиқ энг пешқадам тадбиркорларни олиб, Қорақалпоғистонга бориб келдим. Қораўзак туманида ўнлаб лойиҳаларни амалга оширишни режалаштирганмиз. Бу ишларни мувофиқлаштириш учун у ерда вилоят ваколатхонасини ҳам очдик. Биласиз, Наманганда ер танқис. Деҳқончилик ёки чорвачиликни ривожлантириш учун бўш майдонларни топиш катта муаммо. Қораўзакда эса бепоён ўзлашмаган ерлар мавжуд, бу ҳудуд бизнинг энг катта туманимиз бўлган Попдан ҳам деярли икки баравар катта», — деди вилоят ҳокими.
Абдуразаққовга кўра, наманганлик фермер ва тадбиркорлар томонидан Қораўзакда ҳозиргача 1300 гектар ер ўзлаштирилган. Келгусида бу кўрсаткич 10 минг гектарга етказилади. Ўзлаштирилган ерларда узум, бодом, қизилмия, сабзавот ва полиз экинлари етиштириш, чорвачиликни ривожлантириш кўзда тутилган. Шунингдек, маҳаллий аҳоли бандлигини таъминлаш учун қишлоқ хўжалиги кластерлари ва тикув-трикотаж корхоналари ташкил этилади.
Наманганлик тадбиркорлар томонидан Қорақалпоғистонда бугунги кунгача жами 17 та истиқболли лойиҳа ишлаб чиқилган. Уларнинг умумий қиймати 222 миллиард сўмдан ортиқ.
Изоҳ (0)