Andijonda 250 mlrd so‘mga 700 metr uzunlikdagi ko‘prik quriladi

Andijonda Markaziy temiryo‘l vokzali ustidan o‘tuvchi va shaharning ikki qismini bog‘lovchi 700 metr uzunlikdagi ko‘prik quriladi. Bu haqda viloyat hokimi Shuhrat Abdurahmonov andijonliklarga qilgan murojaatida ma’lum qildi, deya xabar berdi “Daryo” muxbiri.

Kelgusi yilda yana bir yirik loyiha — Bobur shohko‘chasining ikki qismini bog‘laydigan va Markaziy temiryo‘l vokzali ustidan o‘tadigan uzunligi 700 metrni tashkil etuvchi loyiha qiymati 250 milliard so‘mlik ko‘prik qurilishi amalga oshiriladi. Ko‘prik foydalanishga topshirilsa, Amir Temur shohko‘chasi, Paxtakor va Fitrat ko‘chalaridagi tirbandliklarning oldi olinadi. Masofa 5 kilometrga, vaqt sarfi esa 25 foizga qisqaradi.

Shuhrat Abdurahmonov, Andijon viloyat hokimi

Qayd etilishicha, 2021-yilda 9,5 kilometr avtomobil yo‘llarida jami 132 milliard so‘mlik rekonstruksiya qilingan hamda kapital ta’mirdan chiqarilgan. 440 ta mahalla va qishloqlardagi 1471 kilometrlik ichki yo‘llarda esa jami 201 milliard so‘mlik asfaltlashtirish va shag‘allashtirish ishlari olib borilgan. 9 ta ko‘prik ta’mirdan chiqarilgan.

2022-yilda umumiy foydalanuvdagi avtomobil yo‘llarida 70 milliard so‘mlik rekonstruksiya, 53 milliard so‘mlik kapital ta’mirlash, 412 milliard so‘mlik 1500 kilometr uzunlikdagi ichki yo‘llarni ta’mirlash rejalashtirilgan.

Eslatib o‘tamiz, Samarqand viloyatida infratuzilmani yaxshilashga 2022-yilda 274,4 milliard so‘m ajratilishi xabar qilingandi. Mablag‘ hisobidan ikkita tunnel va ikkita yo‘l o‘tkazgich ko‘prik quriladi.