Vazirlar Mahkamasining “Is’hoqxon Ibrat nomidagi Namangan davlat chet tillar instituti faoliyatini tashkil etish chora-tadbirlari to‘g‘risida”gi qarori muhokamaga qo‘yildi.
Unga ko‘ra, milliy va xalqaro ta’lim standartlari asosida mehnat bozorida talab yuqori bo‘lgan xorijiy tillar bo‘yicha malakali kadrlarni tayyorlash maqsadida Namanganda Is’hoqxon Ibrat nomidagi davlat chet tillari instituti ochiladi.
Qayd etilishicha, institutda o‘quv jarayoni 2022—2023-o‘quv yilidan boshlanadi. Qabul parametrlari belgilangan tartibda har yili tasdiqlanadigan davlat buyurtmasiga asosan shakllantiriladi.
Institutga tanlov asosida amaliy tajribaga ega bo‘lgan mutaxassislardan iborat yuqori malakali professor-o‘qituvchilar jalb etiladi. Olis hududlar va xorijiy mamlakatlardan kelib dars beradigan professor-o‘qituvchilar ish davri davomida bepul shaklda xizmat uylari bilan ta’minlanadi.
Shuningdek, o‘zlashtirish ko‘rsatkichi 86 foizdan yuqori bo‘lgan, ilmiy izlanish olib borayotgn talabalarni qo‘llab-quvvatlash maqsadida Hokim stipendiyasi joriy etiladi. Magistraturani a’lo baholarga tamomlagan bitiruvchilar xohishlariga binoan Is’hoqxon Ibrat nomidagi ijod maktabiga dars berish uchun jalb etiladi,
Maktab internati o‘quvchilari uchun institutda “Tarjimonlar klubi” faoliyati yo‘lga qo‘yiladi.
Darslar xalqaro e’tirof etilgan oliy ta’lim muassasalari reytinglarida birinchi mingtalikdan o‘rin olgan xorijiy OTMlar tajribasi va dasturi asosida individual trayektoriyaga asoslangan holda o‘tiladi.
Eslatib o‘tamiz, Toshkent irrigatsiya va qishloq xo‘jaligini mexanizatsiyalash muhandislari instituti universitetga aylantirilgani, Termiz muhandislik-texnologiya instituti tashkil etilgani, O‘zbekistonda Xalqaro qishloq xo‘jaligi universiteti tashkil etilishi va Toshkentda Italiyaning Piza universiteti filiali ochilishi xabar qilingandi.
Izoh (0)