Вазирлар Маҳкамасининг «Исҳоқхон Ибрат номидаги Наманган давлат чет тиллар институти фаолиятини ташкил этиш чора-тадбирлари тўғрисида»ги қарори муҳокамага қўйилди.
Унга кўра, миллий ва халқаро таълим стандартлари асосида меҳнат бозорида талаб юқори бўлган хорижий тиллар бўйича малакали кадрларни тайёрлаш мақсадида Наманганда Исҳоқхон Ибрат номидаги давлат чет тиллари институти очилади.
Қайд этилишича, институтда ўқув жараёни 2022—2023-ўқув йилидан бошланади. Қабул параметрлари белгиланган тартибда ҳар йили тасдиқланадиган давлат буюртмасига асосан шакллантирилади.
Институтга танлов асосида амалий тажрибага эга бўлган мутахассислардан иборат юқори малакали профессор-ўқитувчилар жалб этилади. Олис ҳудудлар ва хорижий мамлакатлардан келиб дарс берадиган профессор-ўқитувчилар иш даври давомида бепул шаклда хизмат уйлари билан таъминланади.
Шунингдек, ўзлаштириш кўрсаткичи 86 фоиздан юқори бўлган, илмий изланиш олиб бораётгн талабаларни қўллаб-қувватлаш мақсадида Ҳоким стипендияси жорий этилади. Магистратурани аъло баҳоларга тамомлаган битирувчилар хоҳишларига биноан Исҳоқхон Ибрат номидаги ижод мактабига дарс бериш учун жалб этилади,
Мактаб интернати ўқувчилари учун институтда «Таржимонлар клуби» фаолияти йўлга қўйилади.
Дарслар халқаро эътироф этилган олий таълим муассасалари рейтингларида биринчи мингталикдан ўрин олган хорижий ОТМлар тажрибаси ва дастури асосида индивидуал траекторияга асосланган ҳолда ўтилади.
Эслатиб ўтамиз, Тошкент ирригация ва қишлоқ хўжалигини механизациялаш муҳандислари институти университетга айлантирилгани, Термиз муҳандислик-технология институти ташкил этилгани, Ўзбекистонда Халқаро қишлоқ хўжалиги университети ташкил этилиши ва Тошкентда Италиянинг Пиза университети филиали очилиши хабар қилинганди.
Изоҳ (0)