Dunyo va o‘zbek sportiga oid 22-dekabrning eng muhim xabarlari dayjesti bilan tanishing.
O‘zbekiston
Parij—2024 Olimpiadasida og‘ir atletikaning vazn toifalari qisqartiriladi
Parijda bo‘lib o‘tadigan yozgi Olimpiya o‘yinlarida og‘ir atletika sport turidan to‘rtta vazn toifasi olib tashlandi va ularning soni 10 tagacha qisqardi.
Tokio—2020 Olimpiadasida 14 vazn toifasida (erkaklar va ayollar 7 tadan) bellashuvlar bo‘lib o‘tgan bo‘lsa, 2024-yilda erkaklar beshta, ayollar beshta vazn toifasida kuch sinashadi.
Vazn toifalari bilan tanishing:
- Erkaklar: -61 kg, -73 kg, -89 kg, -102 kg, +102 kg.
- Ayollar: -49 kg, -59 kg, -71 kg, -81 kg, +81 kg.
Ma’lumot uchun, ushbu sport turida Rio—2016 Olimpiadasida Ruslan Nuruddinov -105 kg, Tokio—2020 Olimpiya o‘yinlarida Akbar Jo‘rayev -109 kg vazn toifasida oltin medalni qo‘lga kiritgan edi. Endi Parij—2024 da ushbu vazn toifalari bo‘lmaydi.
“Navbahor”da serbiyalik murabbiy ish boshlaydi
2020-yilgi mavsumda “Neftchi” murabbiylar shtabidan faoliyat olib borgan Aleksandr Stoymirovich 2022-yildan “Navbahor”da ish boshlaydi. Bu haqda mutaxassisning o‘zi Instagram sahifasida e’lon qildi, deya xabar qilmoqda “Championat.asia”.
Stoymirovich “Navbahor”da jismoniy tayyorgarlikka javobgar bo‘lishi kutilmoqda.
Jahon
Benjamin Mendiga yana bir jinsiy ayblov qo‘yildi
“Manchester Siti” himoyachisi Benjamin Mendiga nisbatan yana bir jinsiy zo‘ravonlik bilan bog‘liq holat bo‘yicha jinoiy ish qo‘zg‘atildi, deya xabar qilmoqda BBC.
Shu tariqa futbolchi yettita jinsiy zo‘ravonlik bilan bog‘liq va yana bitta tegajog‘likka doir jinoyat bo‘yicha ayblanmoqda. O‘yinchi avgust oyidan beri qamoqda saqlanmoqda. 2022-yilning yanvariga belgilangan sud jarayoni keyinroq muddatga qoldirilgan.
Avvalroq sud uch marta Mendini garov evaziga qo‘yib yuborishni rad etgandi. Taxminlarga ko‘ra, Mendiga qo‘yilgan ayblovlar isbotlansa, futbolchi bir umrlik qamoq jazosiga hukm qilinishi mumkin.
“Barselona” Ferran Torres transferi borasida “Manchester Siti” bilan kelishuvga erishdi
Katalonlar Torres transferi uchun ingliz klubiga 55 million yevro to‘laydi. Shuningdek, 10 million yevro miqdorida bonus puli ham nazarda tutilgan.
Torres 23-dekabr kuni Barselonaga uchib ketadi va “ko‘k-anorranglilar” bilan 5 yillik shartnoma imzolaydi, deya xabar qilmoqda Fabrisio Romano.
Koronvirus o‘chog‘iga aylangan “Real”
Madridliklar jamoasida ommaviy koronavirusga chalinish holatlari kuzatilmoqda. 21 va 22-dekabr kunlari jamoaning yana uch futbolchisi izolyatsiyaga olingan.
Himoyachi David Alaba va yarim himoyachi Iskoning testi virusga ijobiy xulosa bergan bo‘lsa, Serxio Arribasda kasallik alomatlari paydo bo‘lgan. Avvalroq Marko Asensio, Garet Beyl, Rodrigo Goes, Andrey Lunin, Marselo va Luka Modrichda COVID-19 aniqlangandi.
Madridliklar 23-dekabr o‘tar kechasi “Atletik B”ga qarshi kechadigan o‘yin uchun qaydnomaga 20 nafar futbolchini kiritdi (Arribasni hisobga olmaganda). Ularning olti nafari “Kastilya” vakillari hisoblanadi.
“Manchester Siti”da Gvardiolaning o‘rnini kim egallashi mumkin?
Manchester Evening News nashri ushbu savol yuzasidan tahliliy maqola e’lon qildi. Unda jamoaning o‘yin uslubini saqlab qolgan holda ispaniyalik mutaxassisning o‘rnini egallay oladigan mutaxassislar varianti muhokama qilingan.
Nashr Gvardiolaning o‘rnini egallashga nomzod uch mutaxassis variantini ilgari surgan: “Ayaks” ustozi Erik ten Hag, “Bavariya” bosh murabbiyi Yulian Nagelsmann va Italiya terma jamoasi murabbiyi Roberto Manchini.
Gvardiolaning “shaharliklar” bilan amaldagi shartnomasi tugashiga 18 oy vaqt bor. Katta ehtimol bilan u shartnomani uzaytiradi ham, biroq har bir yaxshi voqea bir kun kelib tugashi kerak, deyiladi maqolada.
IFFHS talqiniga ko‘ra Yevropa—2020 ramziy terma jamoasi aniqlandi
Xalqaro futbol tarixi statistikasi federatsiyasi (IFFHS) Yevropaning 2021-yilgi ramziy terma jamoasini aniqladi. Ushbu terma jamoadan UEFA mintaqasi terma jamoalarida to‘p suradigan futbolchilar o‘rin oldi.
Darvozabon: Janluiji Donnarumma (“Milan” / “PSJ”);
Himoyachilar: Jorjio Kyellini, Leonardo Bonuchchi (ikkisi – “Yuventus”), Ruben Diash (“Manchester Siti”), Sesar Aspilikueta (“Chelsi”);
Yarim himoyachilar: Ngolo Kante (“Chelsi”), Kevin de Bryuyne (“Manchester Siti”), Jorjinyo (“Chelsi”);Hujumchilar: Kilian Mbappe (“PSJ”), Robert Levandovski (“Bavariya”), Krishtianu Ronaldu (“Yuventus” / “Manchester Yunayted”).
Zaxira: Manuel Noyer (“Bavariya”), Joau Kanselu (“Manchester Siti”), Erling Holand (“Borussiya D”), Antonio Ryudiger (“Chelsi”), Karim Benzema (“Real”), Brunu Fernandesh (“Manchester Yunayted”), Tomas Myuller (“Bavariya”).
Bosh murabbiy: Tomas Tuxel (“Chelsi”).
Izoh (0)