Дунё ва ўзбек спортига оид 22 декабрнинг энг муҳим хабарлари дайжести билан танишинг.
Ўзбекистон
Париж—2024 Олимпиадасида оғир атлетиканинг вазн тоифалари қисқартирилади
Парижда бўлиб ўтадиган ёзги Олимпия ўйинларида оғир атлетика спорт туридан тўртта вазн тоифаси олиб ташланди ва уларнинг сони 10 тагача қисқарди.
Токио—2020 Олимпиадасида 14 вазн тоифасида (эркаклар ва аёллар 7 тадан) беллашувлар бўлиб ўтган бўлса, 2024 йилда эркаклар бешта, аёллар бешта вазн тоифасида куч синашади.
Вазн тоифалари билан танишинг:
- Эркаклар: -61 кг, -73 кг, -89 кг, -102 кг, +102 кг.
- Аёллар: -49 кг, -59 кг, -71 кг, -81 кг, +81 кг.
Маълумот учун, ушбу спорт турида Рио—2016 Олимпиадасида Руслан Нуруддинов -105 кг, Токио—2020 Олимпия ўйинларида Акбар Жўраев -109 кг вазн тоифасида олтин медални қўлга киритган эди. Энди Париж—2024 да ушбу вазн тоифалари бўлмайди.
«Навбаҳор»да сербиялик мураббий иш бошлайди
2020 йилги мавсумда «Нефтчи» мураббийлар штабидан фаолият олиб борган Александр Стоймирович 2022 йилдан «Навбаҳор»да иш бошлайди. Бу ҳақда мутахассиснинг ўзи Instagram саҳифасида эълон қилди, дея хабар қилмоқда «Championat.asia».
Стоймирович «Навбаҳор»да жисмоний тайёргарликка жавобгар бўлиши кутилмоқда.
Жаҳон
Бенжамин Мендига яна бир жинсий айблов қўйилди
«Манчестер Сити» ҳимоячиси Бенжамин Мендига нисбатан яна бир жинсий зўравонлик билан боғлиқ ҳолат бўйича жиноий иш қўзғатилди, дея хабар қилмоқда BBC.
Шу тариқа футболчи еттита жинсий зўравонлик билан боғлиқ ва яна битта тегажоғликка доир жиноят бўйича айбланмоқда. Ўйинчи август ойидан бери қамоқда сақланмоқда. 2022 йилнинг январига белгиланган суд жараёни кейинроқ муддатга қолдирилган.
Аввалроқ суд уч марта Мендини гаров эвазига қўйиб юборишни рад этганди. Тахминларга кўра, Мендига қўйилган айбловлар исботланса, футболчи бир умрлик қамоқ жазосига ҳукм қилиниши мумкин.
«Барселона» Ферран Торрес трансфери борасида «Манчестер Сити» билан келишувга эришди
Каталонлар Торрес трансфери учун инглиз клубига 55 миллион евро тўлайди. Шунингдек, 10 миллион евро миқдорида бонус пули ҳам назарда тутилган.
Торрес 23 декабрь куни Барселонага учиб кетади ва «кўк-анорранглилар» билан 5 йиллик шартнома имзолайди, дея хабар қилмоқда Фабрисио Романо.
Коронвирус ўчоғига айланган «Реал»
Мадридликлар жамоасида оммавий коронавирусга чалиниш ҳолатлари кузатилмоқда. 21 ва 22 декабрь кунлари жамоанинг яна уч футболчиси изоляцияга олинган.
Ҳимоячи Давид Алаба ва ярим ҳимоячи Исконинг тести вирусга ижобий хулоса берган бўлса, Серхио Аррибасда касаллик аломатлари пайдо бўлган. Аввалроқ Марко Асенсио, Гарет Бэйл, Родриго Гоэс, Андрей Лунин, Марсело ва Лука Модричда COVID-19 аниқланганди.
Мадридликлар 23 декабрь ўтар кечаси «Атлетик Б»га қарши кечадиган ўйин учун қайдномага 20 нафар футболчини киритди (Аррибасни ҳисобга олмаганда). Уларнинг олти нафари «Кастиля» вакиллари ҳисобланади.
«Манчестер Сити»да Гвардиоланинг ўрнини ким эгаллаши мумкин?
Manchester Evening News нашри ушбу савол юзасидан таҳлилий мақола эълон қилди. Унда жамоанинг ўйин услубини сақлаб қолган ҳолда испаниялик мутахассиснинг ўрнини эгаллай оладиган мутахассислар варианти муҳокама қилинган.
Нашр Гвардиоланинг ўрнини эгаллашга номзод уч мутахассис вариантини илгари сурган: «Аякс» устози Эрик тен Ҳаг, «Бавария» бош мураббийи Юлиан Нагелсманн ва Италия терма жамоаси мураббийи Роберто Манчини.
Гвардиоланинг «шаҳарликлар» билан амалдаги шартномаси тугашига 18 ой вақт бор. Катта эҳтимол билан у шартномани узайтиради ҳам, бироқ ҳар бир яхши воқеа бир кун келиб тугаши керак, дейилади мақолада.
IFFHS талқинига кўра Европа—2020 рамзий терма жамоаси аниқланди
Халқаро футбол тарихи статистикаси федерацияси (IFFHS) Европанинг 2021 йилги рамзий терма жамоасини аниқлади. Ушбу терма жамоадан УЕФА минтақаси терма жамоаларида тўп сурадиган футболчилар ўрин олди.
Дарвозабон: Жанлуижи Доннарумма («Милан» / «ПСЖ»);
Ҳимоячилар: Жоржио Кьеллини, Леонардо Бонуччи (иккиси – «Ювентус»), Рубен Диаш («Манчестер Сити»), Сесар Аспиликуэта («Челси»);
Ярим ҳимоячилар: Нголо Канте («Челси»), Кевин де Брюйне («Манчестер Сити»), Жоржиньо («Челси»);Ҳужумчилар: Килиан Мбаппе («ПСЖ»), Роберт Левандовски («Бавария»), Криштиану Роналду («Ювентус» / «Манчестер Юнайтед»).
Захира: Мануэль Нойер («Бавария»), Жоау Канселу («Манчестер Сити»), Эрлинг Ҳоланд («Боруссия Д»), Антонио Рюдигер («Челси»), Карим Бензема («Реал»), Бруну Фернандеш («Манчестер Юнайтед»), Томас Мюллер («Бавария»).
Бош мураббий: Томас Тухель («Челси»).
Изоҳ (0)