“O‘zbekiston Respublikasi Oliy Majlisining Inson huquqlari bo‘yicha vakili (ombudsman) to‘g‘risida”gi O‘zbekiston Respublikasining qonuni loyihasi ishlab chiqildi. Bu haqda ombudsman axborot xizmati ma’lum qildi.
Amaldagi qonun 22 ta modda va 10 ta prim moddadan, ishlab chiqilgan qonun loyihasi esa 7 bob va 46 moddadan iborat.
Qonun loyihasida:
- ombudsman o‘z oldida turgan vazifalarini moneliksiz hamda samarali amalga oshirishi uchun qo‘shimcha kafolatlar hamda uning huquqlari, sha’ni va qadr-qimmatini ishonchli himoya qilish choralari;
- ombudsmanning qonunchilik tashabbusi huquqi;
- ombudsmanning O‘zbekiston prezidenti, Oliy Majlis palatalari va Vazirlar Mahkamasiga inson huquqlari, erkinliklarini va qonuniy manfaatlarini himoya qilishning ayrim yo‘nalishlari bo‘yicha huquqiy, tashkiliy, ijtimoiy-iqtisodiy va boshqa chora-tadbirlar ko‘rishga qaratilgan maxsus ma’ruzalar taqdim qilish huquqi;
- ombudsmanning doimiy asosda ishlovchi mintaqaviy vakili maqomi;
- jazoni ijro etish muassasalari va tergov hibsxonalari hududida “Ombudsman qutisi”ni saqlashning huquqiy mexanizmlari;
- inson huquqlari, erkinliklari va qonuniy manfaatlariga rioya etilishi va himoya qilinishi holati to‘g‘risida ombudsman tomonidan jamoatchilikni xabardor qilish tartibi va mexanizmi;
- ombudsman tomonidan inson huquqlari, erkinliklari va qonuniy manfaatlarini himoya qilishga oid qonun hujjatlariga rioya etilishi holati to‘g‘risida O‘zbekiston Respublikasi Prezidenti va Oliy Majlisga hamda davlat organlariga tizimli ravishda axborot taqdim etish tartibi va qator boshqa normalar aks etgan.
Bundan avval O‘zbekistonda biznes-ombudsmanga tadbirkorlar huquqlarini buzgan mansabdorlarga nisbatan ma’muriy javobgarlikka tortish vakolati berilishi haqida xabar berilgandi.
Izoh (0)