O‘zbekiston aholisi Yangi yilda ketma-ket 5 kun dam oladi

Prezident farmoni bilan 2022-yilda qo‘shimcha dam olish kunlari belgilandi, deya xabar qilmoqda Telegram’dagi “Nigoh” kanali.

Qayd etilishicha, barcha xodimlar (ish haftasining turidan qat’i nazar) 3-yanvar — dushanba, 22-mart — seshanba, 23-mart — chorshanba, 11-iyul — dushanba va 2-sentabr — juma kunlari dam oladi.

Olti kunlik ish haftasida ishlaydigan xodimlar uchun 4-yanvar — seshanba, 4-may — chorshanba, 5-may — payshanba, 12-iyul — seshanba, 3-sentabr — shanba va 31-dekabr — shanba dam olish kuni hisoblanadi.

Shunda o‘zbekistonliklar Yangi yil bayramida 5 kun ketma-ket — 31-dekabr, 1–4-yanvar kunlari dam oladi.

Shuningdek, 2022-yilda besh kunlik ish haftasida ishlaydigan xodimlar uchun dam olish kunlari quyidagi tartibda ko‘chirildi:

• 8-yanvar — shanba kunidan 4-yanvar — seshanba kuniga;
• 7-may — shanba kunidan 4-may — chorshanba kuniga;
• 14-may — shanba kunidan 5-may — payshanba kuniga;
• 16-iyul — shanba kunidan 12-iyul — seshanba kuniga.