Филиппинга ёпирилган Раи тайфуни 75 кишининг ҳаётига зомин бўлди. 10 киши бедарак йўқолган, деб ҳисобланмоқда. Бу ҳақда AFP’га таяниб, «Коммерсантъ» хабар берди.
Аввалроқ тайфун оқибатида 20 га яқин одам ҳалок бўлгани хабар қилинган.
Филиппинда табиий офат сабаб узилган алоқа ҳали тикланмаган, шунинг учун тайфун қурбонлари ҳақидаги маълумотлар якуний эмас. Бохол провинцияси губернатори Артур Яп қурбонлар сони ортиши мумкинлигидан хавотирда.
Раи тайфуни Филиппин қирғоқларига 16 декабрь пайшанба куни етиб келганди. Ўн минглаб аҳоли мактаб ва ҳукумат биноларида жойлашган хавфсиз ҳудудларга эвакуация қилинган. Айрим одамларни мажбуран эвакуация қилишга тўғри келган.
Баъзи жойларда шамол тезлиги соатига 185 километрга етган, максимал тезлик соатига 195 километрни ташкил этган. Маҳаллий ҳокимият органлари ёмон об-ҳаво туфайли йўллар ва кўприкларга етказилган зарарни тахминан 178,4 миллион Филиппин песосига (3,56 миллион доллар) баҳолади.
Эслатиб ўтамиз, Филиппинда апрель ойида Суригай тайфуни содир бўлиб, 60 минг киши эвакуация қилинганди. Ўшанда шамол тезлиги 195 километр соатга етиб, уйларнинг томини вайрон қилган ва дарахтларни қўпориб ташлаган.
Изоҳ (0)