O‘zbekistonda avtomobillarga yonilg‘i quyish shoxobchalaridagi benzin narxlari haqida ma’lumot beruvchi Telegram-bot ishga tushiriladi. Bu haqda Monopoliyaga qarshi kurashish qo‘mitasi xabar berdi.
Qayd etilishicha, iste’molchilarning xabardorligini oshirish, jumladan, avtotransport haydovchilariga AYoQShlardagi benzinning chakana narxlari to‘g‘risidagi ma’lumotlarni olishda qulaylik yaratish hamda chakana narxlarni nazorat qilish, monitoring o‘rnatish va bunda jamoatchilik ishtirokini kengaytirish maqsadida “Benzin narxi bot” Telegram-bot joriy etilmoqda.
“Batafsil ma’lumot tez kunlarda OAV hamda rasmiy sahifalarda beriladi”, deyiladi qo‘mita xabarida.
Eslatib o‘tamiz, 1–15-noyabr kunlari O‘zbekiston respublika tovar-xomashyo birjasida Ai-80 markali avtomobil benzinining o‘rtacha sotilish narxlari mahsulotning bir tonnasi uchun 8 million 690 ming so‘mdan 10 million 129 ming so‘mgacha, ya’ni 17 foizga o‘sgan edi. 17-noyabrdan boshlab esa birja savdolarida Ai-80 benzinining narxida tushish kuzatilmoqda. So‘nggi ma’lumotlarga ko‘ra, mahsulotning o‘rtacha narxi bir tonnasi uchun 10 million 129 ming so‘mdan 8 million 101 ming so‘mgacha, ya’ni 20 foizga pasaygan.
