Oliy Majlis Qonunchilik palatasi deputati Rasul Kusherbayev Yakkasaroy tumanidagi daraxtzorni kesish fakti bo‘yicha ochilgan jinoyat ishi natijalariga aniqlik kiritish maqsadida Toshkent prokuraturasi va Ekologiya va atrof-muhitni himoya qilish qo‘mitasiga rasmiy so‘rovlar yuborganini ma’lum qildi, deb yozadi “Gazeta.uz”.
2020-yilning fevralida Building and Supplies kompaniyasi Yunus Rajabiy ko‘chasidagi bir nechta turar joy binolari orasidagi 0,5 gektar maydonga ko‘p qavatli uylarni qurishni rejalashtirgan edi. Kompaniya amaldagi moratoriyga qaramasdan, 81 ta daraxtni kesib tashlagani jamoatchilik noroziligiga sabab bo‘lgan va shahar rahbariyati hamda hukumatining e’tiborini tortgandi.
Daraxtlarni kesishga ruxsat bergan Yakkasaroy tuman hokimining o‘rinbosari Abduvosilxon Sattorovga nisbatan Jinoyat kodeksining 205-modda (hokimiyat yoki mansab vakolatini suiiste’mol qilish) 2-qismi “a” bandi, Building and Supplies ta’sischisi Abdurahim Qodirovga nisbatan esa 198-modda (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 2-qismi bilan bilan jinoyat ishi qo‘zg‘atilgan.
O‘shanda ayblanuvchilardan 1,89 milliard so‘m zarar undirilgan. Ichki ishlar bo‘limi boshlig‘i va tuman prokuroriga hayfsan berilgan. Aholi kesilgan daraxtlar joyini himoya qilishga muvaffaq bo‘lgan, u yerga yangi daraxtlar ekilgan.
Davlat ekologiya qo‘mitasi deputatning so‘roviga undirilgan mablag‘lar hamon Toshkent prokuraturasi hisobida ekanini ma’lum qilgan.
Poytaxt prokuraturasi Rasul Kusherbayev 9-noyabr kuni yo‘llagan so‘rovga javob qaytarmagan. Bu haqda o‘zining Telegram kanalida xabar bergan deputat ko‘p o‘tmay postni o‘chirib tashlagan va bosim bo‘lgani to‘g‘risidagi savollarga izoh bermagan.
Bosh prokuraturaning nashrga tasdiqlashicha, 1,89 milliard so‘m rostdan ham shahar prokuraturasi hisobida turibdi. Idora ma’lumotlariga ko‘ra, jinoyat ishi bo‘yicha tergov 2020-yilning 10-iyulida Jinoyat-protsessual kodeksining 364-modda (dastlabki tergovni to‘xtatish asoslari va tartibi) 1-qismi bilan to‘xtatilgan.
“Ayni vaqtda tergov harakatlari davom etmoqda. Jinoyat ishi bo‘yicha yakuniy qaror qabul qilinganidan keyin shahar prokuraturasi depozit hisob raqamida saqlanayotgan mablag‘ taqdiri hal qilinadi”, — deyiladi Bosh prokuratura xabarida.
Avvalroq Jahongir Ortiqxo‘jayev Toshkentda daraxtlar kesilishida hokimlikning ham aybi borligini tan olgani to‘g‘risida xabar berilgandi.
Izoh (0)